Dúnya jarasıǵı-gúltajı hayal Qaraqalpaqstan Respublikası Pedagogikalıq sheberlik orayında 8-mart – Xalıqaralıq hayal-qızlar kúni múnásibeti menen ” Dúnya jarasıǵı-gúltajı hayal” atamasında bayram ilajı bolıp ótti. Búgingi kúnde elimizde Húrmetli Prezidentimizdiń basshılıǵında hayal-qızlarǵa ǵamqorlıq kórsetiw, olardı hár tárepleme qollap-quwatlaw jáne jámiyettegi abırayın arttırıw mámleketlik siyasattıń tiykarǵı baǵdarına aylanǵan. Pedagogikalıq sheberlik orayında shólkemlestirilgen bul saltanatlı ilaj da mine usınday húrmettiń ayqın kórinisi bolıp esaplanadı. Ilajdı Pedagogikalıq sheberlik orayınıń direktorı G.Kojabaeva kiris sóz benen ashtı. Ol óziniń shıǵıp sóylegen sózinde jıynalǵanlardı báhárdiń birinshi bayramı menen qızǵın qutlıqlap, hayal-qız tek ǵana shańaraqtıń perishtesi emes, al bilimlendiriw tarawınıń da tayanıshı ekenin , “Hayal bar eken – álem nurlı, ómir gózzal. Búgingi kúnde orayımızdıń jetiskenliklerinde siz, áziz hayal-qızlardıń, pidayı ustazlardıń ornı sheksiz. Sizlerdiń sabır-taqatıńız hám kásiplik sheberligińiz jas áwladtıń tárbiyasında eń áhmiyetli tırnaq bolıp xızmet etedi,” – dep atap ótti oray direktorı. Ilaj dawamında orayda nátiyjeli miynet etip atırǵan, óziniń ilimiy hám pedagogikalıq potencialı menen ajıralıp turatuǵın hayal-qızlardıń erisken jetiskenlikleri atap ótildi. Kásiplik sheberligi hám belsendiligi menen hámmege órnek bolıp kiyatırǵan xızmetkerlerge oray basshıları tárepinen tayarlanǵan bayram sawǵaları saltanatlı túrde tapsırıldı. Ilajda shıǵıp sóylegen veteran ustazlar ózlerine kórsetilip atırǵan bunday joqarı itibar hám ǵamqorlıq ushın minnetdarshılıq bildirdi.
