Búgin 14-fevral kúni Pedagogikalıq orayda dúnya tariyxında óz ornına iye úlken saltanat dúzip, jáhán ádebiyatı hám mádeniyatınıń rawajlanıwına salmaqlı úles qosqan ullı mámleketlik ǵayratker, enciklopedist alım, shayır Zahiriddin Muhammed Baburdıń tuwılǵanına 541 jıl tolıwı múnásibeti menen “Babur-tajı kiygen shayır” atamasında ruwxıylıq ilaj bolıp ótti.
Ilajǵa “Social-ekonomikalıq- pánler metodikası” kafedrasınıń professor-oqıtıwshıları, tariyx hám tárbiya páni kursı tıńlawshıları qatnastı.
Shayır hám mámleketlik ǵayratker Zahiriddin Muhammed Babur hám onıń dóretiwshiligi Prezidentimiz Shavkat Mirziyoev tárepinen bılay táriyplengen edi:
«Babur mırza xalqımızdıń ullı perzenti. Ádebiyat, ilim, aǵartıwshılıq kóz-qarasınan ol ele jasamaqta. Ózligimizdi ańlap, ullı tariyxımızdı jaslarǵa túsindirsek, ilimdi hám aǵartıwshılıqtı rawajlandırsaq, hesh qashan kem bolmaymız».
Ózbek ádebiyatınıń kórnekli wákillerinen biri Baburdıń ádebiyat hám kórkem ónerge bolǵan qızıǵıwshılıǵı balalıǵınan qáliplesedi. Dáwjúrek hám mártligi ushın ol jaslıq dáwirinde-aq «Babur» («Jolbarıs») laqabın aladı.
Ilajda kurs tıńlawshıları tárepinen shayır qosıqlarınan atqarılıp, onıń ómiri hám shıǵarmaları tiykarında tayarlanǵan saxnalıq kórinis qoyıp berildi.
