2026-jıl 14-mart kúni Qaraqalpaqstan Respublikası Pedagogikalıq sheberlik orayında PIRLS 2026 xalıqaralıq izertlewi sheńberinde seminar shólkemlestirildi. Seminarǵa A.Avloniy atındaǵı pedagogikalıq sheberlik milliy institutınıń wákilleri qatnastı. Ilajda Pedagogikalıq sheberlik orayınıń direktorı Gulistan Kojabaeva shıǵıp sóylep, xalıqaralıq bahalaw baǵdarlamalarında qatnasıwdıń áhmiyeti, ásirese baslawısh tálimniń sapasın arttırıwda xalıqaralıq izertlewlerdiń ornı áhmiyetli ekenin atap ótti. Seminar dawamında A.Avloniy atındaǵı pedagogikalıq sheberlik milliy institutı Bilimlendiriwdiń sapasın qadaǵalaw bólimi baslıǵı Muhammad Temirov tárepinen PIRLS xalıqaralıq izertlewi sheńberinde belgilengen wazıypalar, izertlewdiń mazmun-mánisi hám onı nátiyjeli shólkemlestiriw máseleleri boyınsha tolıq maǵlıwmatlar berildi. Sonday-aq, test.avloniy.uz platformasınan paydalanıw tártibi, oqıwshılardıń nátiyjelerin tallaw hám olar menen islesiw boyınsha ámeliy usınıslar berildi. Seminarda xalıqaralıq izertlewlerde qatnasıw ushın tańlap alınǵan 12 ulıwma bilim beriw mektebiniń direktorları, direktor orınbasarları hám 33 baslawısh klass muǵallimleri belsene qatnastı. Ilajdıń ámeliy bóliminde oqıwshılar menen tekst ústinde islew, sın kózqarastan hám logikalıq pikirlew kónlikpelerin rawajlandırıw boyınsha ámeliy shınıǵıwlar ótkerildi.
