Sońǵı jıllarda mámleketimizde sanlı texnologiyalar jedel rawajlanıp, puqaralardıń internetten paydalanıw imkaniyatları keńeyip barmaqta. Bul bolsa jeke maǵlıwmatlar hám bank kartası qáwipsizligin támiyinlewde joqarı juwapkershilikti talap etedi. Sebebi, kóplegen puqaralarımız, internet aldawshılarınıń jalǵan aldawlarına ushırap, bilip-bilmey jeke hám bank karta maǵlıwmatların beriwi nátiyjesinde, materiallıq hám ruwxıy zıyan kórip atırǵanlıǵı baqlanbaqta. Xalıqtan kelip túsken múrájatlar bank kartaları menen baylanıslı urlıq hám aldawshılıq jaǵdayları kúnnen-kúnge kóbeyip atırǵanın kórsetpekte. Pedagogikalıq sheberlik orayında kiberqáwipsizlikke baǵıshlanǵan úgit-násiyatlaw ilajı shólkemlestirildi. Ilajda Sanlı texnologiyalardı rawajlandırıw bóliminiń bas qánigesi Joldasbay Dalibaev tárepinen zamanagóy kiberqáwipler, jeke maǵlıwmatlardı qorǵaw hám sociallıq tarmaqlardan qáwipsiz paydalanıw boyınsha maǵlıwmatlar berildi.
