Qaraqalpaqstan Respublikası Pedagogikalıq sheberlik orayında korrupciyanıń aldın alıw, jámiyette hadallıq hám ashıq-aydınlıq principlerin bekkemlewge baǵıshlanǵan “Korrupciyanıń aldın alıwda bilimlendiriwdiń roli” atamasında májilis ótkerildi. Ilajda Qaraqalpaqstan Respublikası Ádillik ministrliginiń korrupciyaǵa qarsı qadaǵalaw boyınsha bas másláháchisi Ajiniyaz Nurabullaev, Nókis qalası yuridikalıq xızmet kórsetiw bóliminiń baslıǵı Qaraqalpaqstan Respublikası Ádillik ministrliginiń Tumur Utemuratov, oraydıń professor-oqıtıwshıları hámde tıńlawshıları qatnastı.
Onda korrupciyaǵa qarsı gúresiwdiń nátiyjeli mexanizmlerin qáliplestiriwde bilimlendiriw sistemasınıń ornı, jaslardıń sanasında hadallıq, hújdanlılıq hám nızamlarǵa húrmet sıyaqlı qádiriyatlardı bekkemlew máselelerine ayrıqsha itibar qaratıldı. Májilis dawamında bilimlendiriw mákemelerinde ashıq-aydınlıqtı támiyinlew, korrupciyanıń aldın alıwǵa qaratılǵan profilaktikalıq ilajlardı kúsheytiw hám tarawda ámelge asırılıp atırǵan reformalardıń mazmun-mánisi boyınsha pikir-usınıslar bildirildi. Sonday-aq, qatnasıwshılarǵa korrupciyaǵa qarsı gúresiw tarawındaǵı nızamshılıq hújjetleriniń mazmunı, korrupciyalıq qáwip-qáterlerdiń aldın alıw mexanizmleri jáne bilimlendiriw sistemasında hadallıq mádeniyatın qáliplestiriw hám keńnen úgit-násiyatlaw máseleleri boyınsha túsinikler berildi.
Ilaj juwmaǵında korrupciyaǵa qarsı mawasasız múnásibetti qáliplestiriw, hár bir xızmetker hám pedagogtıń huqıqıy mádeniyatın hám juwapkershiligin arttırıw, bilimlendiriw ortalıǵında hadallıq hám ádillik principlerin bunnan bılay da bekkemlew áhmietli wazıypa ekeni atap ótildi. 
