Qaraqalpaqstan Respublikası Pedagogikalıq sheberlik orayında tıńlawshılar arasında kiberqáwipsizlikti támiyinlew, mobil telefonlardaǵı jeke maǵlıwmatlardı qorǵaw hám internet aldawshılıǵınıń aldın alıwǵa qaratılǵan profilaktikalıq ilaj ótkerildi. Ilajda Nókis qalası 2-sanlı Ishki isler bólimi profilaktika inspektorı, podpolkovnik B. Madreymov hám leytenant R. Rustamov, sonday-aq, oraydıń Sanlastırıw hám jasalma intellektti engiziw bólimi bas qánigesi Joldasbay Dalibaev hám jetekshi qánigesi Paraxat Shortanov qatnasıp, tıńlawshılarǵa belgisiz dáreklerden kelgen APK faylların ornatıwǵa baylanıslı qáwip-qáterler, jeke maǵlıwmatlardı qorǵaw hám kiber aldawshılıqtan saqlanıw ilajları haqqında túsinikler berdi. Sonday-aq, ilaj dawamında tıńlawshılardıń mobil telefonlarına Google Play platforması arqalı “APK qorǵawshı” qosımshası ornatıp berildi hám onnan paydalanıw boyınsha ámeliy kórsetpeler berildi. Ilajdıń tiykarǵı maqseti tıńlawshılardıń kiberqáwipsizlik boyınsha bilimlerin arttırıw hám jeke maǵlıwmatlardıń qáwipsizligin támiyinlewden ibarat. Umıtpań: qáwipsizligińiz óz qolıńızda!
