Qaraqalpaqstan Respublikası pedagoglardı jańa metodikalarǵa úyretiw milliy orayında «Social-ekonomikalıq pánler metodikası» kafedrasınıń aǵa oqıtıwshısı Temirbay Ǵaniev tárepinen “Tariyx sabaqlarında Blum taksonomiyası texnologiyasınan paydalanıw” temasında ashıq sabaǵı ótkerildi.
Onı ótkeriwden maqset – tıńlawshılarǵa Benjamin Blum taksonomiyası texnologiyası haqqında túsinik beriw hám tariyx sabaqlarında Blum taksonomiyasınan paydalanıw boyınsha ámeliy kónlikpeler payda etiw bolıp esaplanadı.
– Seminar dawamında aqılıy hújim, soraw-juwap, topar jumısı, diskussiya, gáp dúziw shınıǵıwları arqalı qatnasıwshılardıń Benjamin Blum taksonomiyası texnologiyası haqqındaǵı maǵlıwmatlarǵa iye bolıwı, biliw procesiniń 6 basqıshı: tanıp alıw, eslep qalıw; táriyiplep beriw, túsindiriw; ámelge asırıw; analizlew; bahalaw; jaratıw haqqında jeke juwmaqqa keliw, tariyx sabaqlarında Blum taksonomiyasınan paydalanıw boyınsha ámeliy kónlikpelerge iye bolıwı ushın háreket etildi,-deydi oraydıń «Social-ekonomikalıq pánler metodikası» kafedrasınıń aǵa oqıtıwshısı Temirbay Ǵaniev.
Taksonomiya – bul ierarxiyalıq túrde dúzilgen ápiwayıdan quramalıǵa shekemgi maqsetler sisteması bolıp esaplanadı.
Blum taksonomiyası altı túrli dárejeden ibarat pikirlew qábiletleriniń ierarxiyalıq modeli. Usı model sheńberinde sın pikirlewdi rawajlandırıwdı kórip shıǵıw maqsetke muwapıq. Sebebi, oqıwshılarda sın pikirlewdi rawajlandırıw hám onı qadaǵalaw ushın muǵallimniń qollanılatuǵın tapsırma hám sorawları oy hám sananıń qanshelli dárejede rawajlanǵanlıǵın anıqlay alatuǵın bolıwı kerek. Blum taksonomiyası – bul oqıwshılardıń barlıq túrdegi aqılıy jumısın baqlawǵa járdem beretuǵın qural.
Blum taksonomiyası – 1956-jılı B.Blum tárepinen “bilim beriw maqsetleri taksonomiyası: biliw tarawı” kitabında usınılǵan kognitiv (jaratıwshılıq) tarawdaǵı bilim beriw maqsetleriniń klassifikaciyası.
Blumnıń taksonomiyası búgingi kúni bilim beriwdi rejelestiriw quralı sıpatında keńnen qollanılıp kelmekte.
Seminar dawamında qatnasıwshılar qánigelerden ózlerin qızıqtırǵan sorawlarǵa juwap aldı.
