ÁZIZ HÁM HÚRMETLI ANALAR, QÁDIRLI APA-SIŃLILER!
Sizlerdi báhárdiń birinshi áyyamı – 8-mart bayramı menen Qaraqalpaqstan Respublikası Pedagogikalıq sheberlik orayı atınan qızǵın qutlıqlayman.
Bársheńizge ózimniń eń jaqsı hám shın júrekten shıqqan tileklerimdi bildirip, bárqulla shańaraǵıńız, jaqınlarıńız benen, elımızdıń ardaǵında bolıw baxtın tileymen. Shańaraq hám jámyiettiń tayanıshı, turmısımızdıń kórki bolǵan hayal-qızlardı qádirlew, olarǵa húrmet kórsetiw xalqımız ushın ázelden ullı qádiriyat bolıp kelgenin hesh birimiz umıtpaymız. Siz gózzal hám tákirarlanbas, áziz hayal-qızlarımız haqqında oǵada jıllı pikirler aytıw, kóplegen táripler keltiriwge boladı.
Bul baǵdarda Húrmetli Prezidentimiz Shavkat Miromonovich Mirziyoevtiń “Siz, húrmetli hayal-qızlarımız ózińizdiń analıq mehirińiz, turmıslıq bilim hám tájiriybeńiz benen perzentlerimizdi túrli qáwip-qáterlerden saqlawda, olardı bekkem erk-ıqrarlı, ruwxıy-intellektuallıq jaqtan jetik, janajan Watanımızǵa sadıq insanlar etip tárbiyalawda bunnan bılay da kúsh-ǵayratıńızdı ayamaysız, dep isenemen. Ásirese, qız balalardı turmısqa tayarlaw, olardı zamanagóy bilimler, kásip-ónerlerge úyretiwde biz bárinen burın sizlerge súenemiz” degen sózleri hár tárepleme ibratlı bolıp esaplanadı.
Haqıyqatında da, mámleketimizdiń jámiyetlik-siyasiy turmısınıń túrli tarawlarında hayal-qızlardıń belsendiligi hám pidayılıǵı, hadal miynetleri menen turmısımızdıń payızlı bolıwına óz úleslerin qosıp kiyatırǵanlıǵı bárshemizdi quwandıradı. Jáne bir márte sizlerdi hám sizler arqalı elimizdiń dilbar hayal-qızların qızǵın qutlıqlayman. Sizlerge salamatlıq, baxıt-ıǵbal, shańaraqlarıńızǵa tınıshlıq, qut-bereket tileymen.
Sebebi, hayal degen ullı jaratılısta názik minez hám ullı júrek, názik kewil, biytákirar pidayılıq hám ananıń mártligi jámlengen. Mine usınday pazıyletler iyesi bolǵan hár birińizge bayram múbárek bolsın!
Húrmet penen,
VENERA BEKMURATOVA
Qaraqalpaqstan Respublikası Pedagogikalıq sheberlik orayı direktorı
