Házirgi waqıtta Prezident Shavkat Mirziyoevtiń basshılıǵında medicina tarawındaǵı reformalardıń gezektegi basqıshında turǵan tiykarǵı wazıypalardı dodalawǵa baǵıshlanǵan videoselektor májilisi bolıp ótpekte. (https://t.me/Press_Secretary_Uz/5709)
Onda juqpalı keselliklerdiń 35-40 procenti ápiwayı gigiena qaǵıydalarına ámel etpew aqıbetinde júzege kelip atırǵanı kórsetip ótildi. Usı múnásibet penen barlıq mektep, baqsha, texnikum, joqarı oqıw ornı, poliklinika hám emlewxanalarda “Taza qollar” baǵdarlaması ámelge asırıladı. Oǵan bola:
– bilimlendiriw hám medicina shólkemlerinde qol juwıw orınları sanitariyalıq-gigienalıq qurallar menen tolıq támiyinlenedi.
– sharayatı awır bolǵan 126 mektepte hájetxanalar imarat ishinde jaylastırılıp, jańadan qurıladı, 6 mıńnan aslam baqshaǵa geliokollektor alıp beriledi;
– 4 mıń 295 sociallıq mákemede suw bakı hám sisterna ornatıladı.
Usı maqsetler ushın usı jıldıń ózinde byudjetten 780 milliard sum ajıratıladı. Hár bir sociallıq taraw mákemesi taza, azada bolıwı, onda adamlar ushın qolaylı sanitariyalıq-gigienalıq sharayat jaratılıwı shárt ekenligi atap ótildi.
