Qaraqalpaqstan Respublikası Pedagogikalıq sheberlik orayında “Stress hám psixologiyalıq portret” atamasında seminar-trening shólkemlestirildi.
Qaraqalpaqstan Respublikası Pedagogikalıq sheberlik orayında xojalıq xızmetkerleri ushın “Stress hám psixologiyalıq portret” atamasında seminar-trening bolıp ótti. Bul ilaj kásiplik jumıs penen bir qatarda kúndelikli turmısta da úlken áhmietke iye bolǵan psixologiyalıq bilim hám kónlikpelerdi qáliplestiriwge qaratıldı.
Seminar-treningtiń tiykarǵı maqseti – jámáát aǵzaları arasında salamat ruwxıy-psixologiyalıq ortalıqtı jaratıw, óz-ara birge islesiw hám qarım-qatnastı bekkemlew, sonday-aq, stress, túskinlik hám sharshaw jaǵdaylarında psixologiyalıq járdem kórsetiw boyınsha zárúr ámeliy kónlikpelerdi rawajlandırıwdan ibarat boldı.
Trening dawamında qatnasıwshılar psixologiyalıq jaǵdayın tallaw, ishki sezimlerin ańlaw hám stressti basqarıwdıń nátiyjeli usılları menen tanıstı. Bul ilaj tek ǵana ruwxıy salamatlıqtı bekkemlew emes, al ruwxıy turaqlılıqtı támiyinlew jolında áhmietli qádem boldı.
