Búgin Qaraqalpaqstan Respublikası Pedagogikalıq sheberlik orayında “Mektepke shekemgi bilimlendiriwden paydalanıw imkaniyatların keńeytiw” joybarı sheńberinde úsh kúnlik seminar-trening óz jumısın basladı.
Ilajdıń tiykarǵı maqseti – Qaraqalpaqstan Respublikasında mektepke shekemgi bilimlendiriwdiń sapasın arttırıw, sistemada jumıs alıp barıp atırǵan qánigelerdiń kásiplik potencialın bekkemlew hám aldınǵı sırt el tájiriybelerin ámeliyatqa engiziwden ibarat.
Seminar-treningti oray direktorı wazıypasın waqtınsha atqarıwshı Iztileuov Baymurat Dayırovich ashıp berdi.
Ilajda Qaraqalpaqstan Respublikası Mektepke shekemgi hám mektep bilimlendiriwi ministrliginiń wákilleri, sonday-aq, UNICEFtiń erte rawajlanıw hám mektepke shekemgi bilimlendiriw máseleleri boyınsha qánigeleri hám UNICEF xalıqaralıq eksperti Kristian Fabbi qatnaspaqta.
Bul seminar tómendegi baǵdarlarda shólkemlestirilgen: Islam rawajlanıw bankiniń baslaması menen ámelge asırılıp atırǵan “Mámleketlik emes mektepke shekemgi bilimlendiriw mákemeleri tarmaǵın mámleketlik-jeke menshik sheriklik tiykarında rawajlandırıw” joybarı; UNICEF hám Mektepke shekemgi hám mektep bilimlendiriwi ministrligi menen birgeliktegi “Mektepke shekemgi bilimlendiriwden paydalanıw imkaniyatların keńeytiw” joybarı; “Pedagog hám basshılardıń potencialın bekkemlew, kásiplik tayarlaw hám qánigeligin arttırıw sistemasın reformalaw” joybarı sheńberinde.
Úsh kún dawam etetuǵın seminar-trening procesinde qatnasıwshılar ushın mektepke shekemgi bilimlendiriwdiń sapasın arttırıwǵa qaratılǵan teoriyalıq hám ámeliy sabaqlar shólkemlestiriledi.
