Professor-oqıtıwshılardıń ilimiy jumısı boyınsha ashıq sáwbet shólkemlestirildi

Pedagogikalıq sheberlik orayında professor-oqıtıwshılardıń ilimiy potencialın arttırıw, xalıqaralıq ilimiy jurnallarda maqalalar basıp shıǵarıw jumısın bunnan bılay da rawajlandırıw maqsetinde ashıq sáwbet shólkemlestirildi. Májilisti Akademiyalıq iskerlik boyınsha direktor orınbasarı A.B. Qaypnazarov ashıp berdi hám alıp bardı. Orayda jámi 146,5 xızmetker jumıs alıp barıp, olardan 51 i professor-oqıtıwshılar bolıp esaplanadı. Ilimiy dárejege iye professor-oqıtıwshılardıń úlesi 35,2 procentti quraydı. Atap aytqanda, orayda 1 professor, 2 docent hám 15 ilimiy dárejege iye pedagoglar jumıs alıp barmaqta. Professor-oqıtıwshılardıń ilimiy jumısı nátiyjesinde: sırt el ilimiy jurnallarında 36 ilimiy maqala, JAK tárepinen tán alınǵan jurnallarda 22 maqala, xalıqaralıq ilimiy konferenciyalarda 22, respublika kólemindegi ilimiy konferenciyalarda 61 tezis hám maqalalar járiyalanǵan. Bul kórsetkishler professor-oqıtıwshılardıń xalıqaralıq ilimiy maydandaǵı belsendiliginiń artıp baratırǵanınan dárek beredi. Sonday-aq, orayda 12 biyǵárez izertlewshi ilimiy-izertlew jumısları menen shuǵıllanıp, olardan 2 DSc, 10 PhD ilimiy dárejesine iye. Bul jaǵday ilimiy mektepler hám ilimiy joybarlardı rawajlandırıw ushın bekkem tiykar jaratpaqta. Ámelge asırılǵan jumıslar sheńberinde: xalıqaralıq abıraylı ilimiy jurnallarda maqala tayarlaw boyınsha metodikalıq járdemler, ilimiy maqalalardıń sapasın arttırıwǵa qaratılǵan redakciyalıq hám ekspert másláhátleri, jas izertlewshiler hám professor-oqıtıwshılar ushın ilimiy joybar hám grantlar boyınsha baǵdarlawshı treningler, xalıqaralıq ilimiy birge islesiwdi keńeytiwge qaratılǵan shólkemlestiriw ilajları ámelge asırıldı. Nátiyjede, oraydıń tiykarǵı shtatı boyınsha ilimiy potencialı 30,7 procentti qurap, ilimiy jumıs kórsetkishleri izbe-iz artıp barmaqta.