Qaraqalpaqstan Respublikası Pedagogikalıq sheberlik orayında Ózbekstan hám Qaraqalpaqstan Respublikası Xalıq bilimlendiriw aǵlası, “Shuhrat” medalı iyesi Arzımbetova Biybisara Atamuratovnanıń 75 jasqa tolıwı múnásibeti menen “Áziz ustaz – 75 jasta!” atamasında ilaj bolıp ótti. Ilajdı oray direktorı G.Kojabaeva ashıp berip, yubiley iyesin qutlı sáne menen qızǵın qutlıqladı hám oray jámááti atınan tayarlanǵan estelik sawǵaların tapsırdı.
Ilaj dawamında Anıq hám tábiyıy pánler metodikası kafedrası baslıǵı, docent Q.Turmanov hám professor Marat Utepbergenovlar shıǵıp sóylep, Arzımbetovanıń bilimlendiriw sistemasına qosqan salmaqlı úlesi, kóp jıllıq nátiyjeli miyneti hám pidayı xızmetin ayrıqsha atap ótti.
Biybisara Atamuratovna Arzımbetova 1951-jılı Taxtakópir rayonında tuwılǵan. 1974-jılı T.G.Shevchenko atındaǵı Qaraqalpaq mámleketlik pedagogikalıq institutınıń fizika-matematika fakultetin tamamlaǵan.
Házirgi kúnde ol “Anıq hám tábiyıy pánler metodikası” kafedrasında aǵa oqıtıwshı lawazımında jumıs alıp barmaqta. Onıń ulıwma pedagogikalıq jumıs stajı 50 jıldı quraydı. Jumısı dawamında 30 dan aslam metodikalıq qollanba hám usınıslar tayarlaǵan.
“Bilim” baspasında 4 metodikalıq qollanba basıp shigarilgan. Baspasózde 55 ilimiy-metodikalıq maqalaları járiyalanǵan. 27 aldıńǵı pedagogikalıq texnologiyalardı ámeliyatqa engizip, ǵalaba en jaydırǵan.
