2026-jıl 23-24-oktyabr kúnleri UNICEF, Google for Education hám STEM Solution birgelikte IŞONÇ 2030 joybarı sheńberinde “Google bilimlendiriw quralları arqalı sanlı inklyuziya hám hámme ushın qolaylı bilimlendiriw” temasında treningler shólkemlestirildi. Respublika boyınsha tańlap alınǵan 50 pilot inklyuziv mekteplerdiń besewi Qaraqalpaqstan Respublikasında jaylasqan. Bul mekteplerde pedagoglardıń sanlı kompetenciyaların rawajlandırıw hám inklyuziv bilimlendiriw imkaniyatların keńeytiwge qaratılǵan treningler basqıshpa-basqısh ótkerilmekte. Atap aytqanda, treningler tómendegi mekteplerde shólkemlestiriliwi rejelestirilgen: Nókis qalası: 8-mektep — 23-24-oktyabr; 34-mektep — 13-14-noyabr; Beruniy rayonı: 36-mektep — 30-31-oktyabr; Moynaq rayonı: 3-mektep — 4-5-noyabr; Taxtakópir rayonı: 5-mektep — 6-7-noyabr. Treninglerde Qaraqalpaqstan Respublikası Pedagogikalıq sheberlik orayı Anıq hám tábiyǵıy pánler metodikası kafedrası aǵa oqıtıwshısı Dilfuza Qutlımuratova hám Metodikalıq xızmet kórsetiw bólimi metodisti Abdikadir Bayniyazov trener sıpatında qatnaspaqta. Shınıǵıwlar dawamında pedagoglarǵa Çromebook qurılmalarınan paydalanıw, Google Workspace for Education platforması imkaniyatları, Gemini jasalma intellekt quralları hám inklyuziv bilimlendiriwdi qollap-quwatlawshı sanlı sheshimler boyınsha teoriyalıq bilimler hám ámeliy kónlikpeler berilmekte. Joybardıń tiykarǵı maqseti — pedagoglardıń sanlı kompetenciyaların rawajlandırıw, bilimlendiriw procesine zamanagóy texnologiyalardı nátiyjeli engiziw hám barlıq oqıwshılar ushın qolaylı, inklyuziv hám teń bilimlendiriw imkaniyatların jaratıwdan ibarat.
