Qaraqalpaqstan Respublikası Pedagogikalıq sheberlik orayında tıńlawshılardıń logikalıq pikirlew qábiletin rawajlandırıw, jámáátte islew kónlikpelerin qáliplestiriw hámde kásiplik potencialın arttırıw maqsetinde “Zakawat” intellektuallıq oyını shólkemlestirildi. Onda oraydıń qánigeligin arttırıw kurslarında bilim alıp atırǵan ulıwma bilim beriw mektepleri direktorlarınıń oqıw isleri hám ruwxıy-aǵartıwshılıq isler boyınsha orınbasarları qatnastı. Intellektual bellesiw “Pedagogika, psixologiya hám tálim texnologiyaları metodikası” kafedrası professor-oqıtıwshıları tárepinen shólkemlestirildi. Oyınnıń tiykarǵı maqseti qatnasıwshılardıń kásiplik bilimlerin bekkemlew, logikalıq pikirlew qábiletin rawajlandırıw, pedagogikalıq jumısta ushırasatuǵın qıyın jaǵdaylarda tez hám durıs qarar qabıl etiw kónlikpelerin qáliplestiriw, sonday-aq, ózara tájiriybe almasıw hám jámáátlik birge islesiwdi kúsheytiwden ibarat. Jarısta tıńlawshılardan dúzilgen “Lider” hám “Juwapkerler” komandaları óz-ara bilim hám ziyreklik boyınsha bellesti. Qatnasıwshılardıń bilim dárejesi, operativligi hám logikalıq pikirlew qábileti bir neshe basqıshtan ibarat quramalı hám qızıqlı sorawlar arqalı sınaqtan ótkerildi.
