Búgin Qaraqalpaqstan Respublikası Pedagogmkalıq sheberlik orayında 14-yanvar – Watan qorǵawshıları kúni hám Qurallı Kúshlerimiz dúzilgeniniń 33 jıllıǵı múnásibeti menen bayram ilajı bolıp ótti.
Onda Qaraqalpaqstan Respublikası Pedagogikalıq oray direktorı orınbasarı A.Qaypnazarov shıǵıp sóylep, qatnasıwshılarıdı bayram múnásibeti menen qutlıqlap, húrmetli Prezidentimiz, Qurallı Kúshler Joqarı Bas Sárkardası tárepinen tarawǵa qaratılıp atırǵan úlken itibardı ayrıqsha atap ótti.
Ullı Ámir Temur babamız aytqanınday, jeńis táǵdirin bárinen burın áskerdiń jawıngerlik ruwxı hám tayarlıǵı, ruwxıy qúdireti hám bekkem erk-ıqrarı sheshedi.
Milliy armiyamızdıń shegaralarımızdıń qáwipsizligin, Watanımız tınıshlıǵın támiyinlewdegi miynetleri teńsiz. Watan qorǵawshılarımız bar eken, elimiz tınısh, aspanımız ashıq, xalqımızdıń abadanlıǵı hám tatıwlıǵı dawamlı boladı.
Ilaj dawamında oray hayal-qızları tárepinen tayarlanǵan bayram sawǵaları, er-jigitlerdiń hár tárepleme sheberlik qábiletin kórsetiwshi qızıqlı oyın hám viktorinalar, jıynalǵanlarǵa haqıyqıy bayram keypiyatın baǵıshladı.
