Jaqında Ózbekstan Respublikası Mektepke shekemgi hám mektep bilimlendiriwi ministrligi tárepinen mobil tájiriybe arttırıw xızmetleri tiykarında shólkemlestirilgen avtobus Qaraqalpaqstan Respublikası Pedagogikalıq sheberlik orayı ushın da ajıratılıp, bul mobil tájiriybe arttırıw xızmetleri respublikamızdıń alıs hám shetki aymaqlarında jaylasqan mektepke shekemgi bilimlendiriw shólkemleriniń pedagog kadrları ushın óz jumısların baslap jiberdi. Mobil tájiriybe arttırıw xızmetleri auditoriya kórinisindegi qayta úskenelengen avtobus negizinde shólkemlestirilgen bolıp, bul avtobus bir waqıttıń ózinde 14 pedagogqa sabaq ótiw ushın oqıw orınları, 10 NR markalı noutbuk, 1 dana 65 dyuymlı interaktiv monitor, jazıw doskası, 1 internet tarqatıwshı qurılma WI FI router menen qayta úskenelengen. Bul avtobustan uzaq hám shetki aymaqlarda jasaytuǵın mámleketlik hám jeke menshik mektepke shekemgi bilimlendiriw shólkemleriniń pedagog kadrları ushın mobil qánigelik arttırıw xızmetlerin kórsetiw, yaǵnıy, úzliksiz kásiplik rawajlandırıw (“metodikalıq sheberlik kúni” hám “metodikalıq sheberlik sabaǵı”) ilajların tiyisli aymaqlarǵa barǵan halda ótkeriw, trening, seminar hám basqa da ilajlardı shólkemlestiriw maqsetinde paydalanıladı. Búgin usı arnawlı avtobus Nókis qalasındaǵı qalaǵa uzaq Qarataw MPJ aymaǵında jaylasqan 44-sanlı mámleketlik mektepke shekemgi bilimlendiriw shólkemine barıp, bul jerdegi pedagoglarǵa ózleri jasaytuǵın hám jumıs isleytuǵın orınlarınan uzaqlaspaǵan halda úzliksiz kásiplik rawajlanıwı, bilimlerin jańalawı ushın imkaniyat jaratıldı. Bul jerde tájiriybe-sınaw tárizinde Mektepke shekemgi baslawısh hám arnawlı tálim metodikaları kafedrasınıń oqıtıwshıları tárepinen shólkemniń pedagog kadrları ushın mobil qánigelik arttırıw kursı shólkemlestirildi. Ózbekstan Respublikası Prezidentiniń 2024-jıl 30-sentyabrdegi “Mektepke shekemgi bilimlendiriwdiń sapası hám nátiyjeliligin bunnan bılay da arttırıw boyınsha qosımsha ilajlar haqqında”ǵı pármanı hám Mektepke shekemgi hám mektep bilimlendiriwi ministriniń usı jıl 19-fevraldaǵı arnawlı buyrıǵınıń orınlanıwın támiyinlew maqsetinde oqıw baǵdarlaması islep shıǵılǵan. Oqıw baǵdarlamasında hár qıylı temalar orın alǵan bolıp, máselen “Gózzal báhár” temasında, erte jastan balalardıń súwret salıwı, súwret salıwda qollanılatuǵın usıl hám texnologiyalar haqqında túsinik beriw, “Máwsimlik ózgerisler” temasında tarawlar tiykarında maqsetlerdi belgilew, temadaǵı maqsetlerdi ámelge asırıw usılları, texnologiyaları, bilimlendiriw jumısında paydalanılatuǵın kórgizbeli hám tarqatpa qurallar, “Xalıq derekleri” temasında balalardı milliy qádiriyatlar, dástúrler tiykarında rawajlandırıwdıń nátiyjeli usılların úyretiw hám basqa da usı sıyaqlı áhmiyetli wazıypalar belgilengen. – Mobil qánigelik arttırıw kursında usı tema hám baǵdarlarda tiyisli sabaqlar ótilip, bul alıs elatlı punkttegi mektepke shekemgi bilimlendiriw shólkeminde jumıs islep atırǵan hayal-qızlar Nókiske áwere bolıp kelip, qánigeligin arttırıw sabaqlarına qatnawdan qutılıp, óz shańaraǵınıń janında bolıwına imkaniyat jarattı,-deydi Mektepke shekemgi baslawısh hám arnawlı tálim metodikaları kafedrasınıń baslıǵı Bayrambay Utemuratov. Bul baǵdardaǵı jumıslar belgilengen grafik tiykarında respublikamızdıń basqa da uzaq awıllarındaǵı shólkemlerde ámelge asırılıwı belgilengen. 
«Aqlvoy» avtobusı menen alıs awıllardaǵı oqıw sabaqları baslandı
Back To Top