2025-jıl noyabr ayınan baslap Pedagogikalıq sheberlik orayı tárepinen oqıtıwshı hám pedagog xızmetkerler ushın 100 saatlıq qánigeligin arttırıw kursları baslandı. Bul kurslar 21 baǵdar boyınsha 36 oqıw toparında shólkemlestirilip, olarda jámi 965 oqıtıwshı-pedagoglar qatnaspaqta.
Kurslar bilimlendiriwdiń sapasın hám nátiyjeliligin arttırıw, aldınǵı pedagogikalıq tájiriybelerdi úyreniw hám olardı ámeliyatqa engiziw, sonday-aq, zamanagóy bilimlendiriw texnologiyaları hám metodikalıq qatnaslardı keńnen engiziw maqsetinde shólkemlestirilgen.
Pedagogikalıq sheberlik orayı tárepinen dúzilgen oqıw baǵdarlamaları oqıtıwshılardıń kásiplik kompetenciyaların jáne de rawajlandırıwǵa, olardıń ámeliy kónlikpelerin bekkemlewge hám innovaciyalıq pedagogikalıq texnologiyalardan nátiyjeli paydalanıw kónlikpelerin qáliplestiriwge qaratılǵan.
Kurs dawamında tıńlawshılar:
zamanagóy bilimlendiriw metodları hám texnologiyaları menen tanısadı;
sabaq procesinde interaktiv qatnasıqlardan paydalanıw boyınsha ámeliy shınıǵıwlarda qatnasadı;
óz tarawlarına baylanıslı aldınǵı tájiriybelerdi úyrenedi;
bilimlendiriw procesin sanlastırıw, oqıw procesinde IKT qurallarınan nátiyjeli paydalanıw kónlikpelerin rawajlandıradı.
Sonday-aq, kurs juwmaǵında qatnasıwshılarǵa belgilengen tártipte qánigeligin arttırıw sertifikatları tapsırıladı.
