Ózbekstan Respublikası Ministrler Kabinetiniń «Ataqlı mámleketlik hám jámiyetlik ǵayratker Qállibek Kamalovtıń 100 jıllıǵın keńnen belgilew haqqında»ǵı 103-sanlı qararı qabıl etildi.
Qararǵa muwapıq, Qaraqalpaqstan Respublikası Pedagogikalıq sheberlik orayınıń Tillerdi oqıtıw metodikası kafedrası tárepinen qaraqalpaq xalqınıń belgili perzenti, mámleketlik hám jámiyetlik ǵayratker Qállibek Kamalov tuwılǵan kúniniń 100 jıllıǵı hámde mámleketlik hám jámiyetlik ǵayratker, jazıwshı Sharaf Rashidov tuwılǵan kúniniń 109 jıllıǵı múnásibeti menen “Dáwir qaharmanları” atamasında dógerek sáwbeti shólkemlestirildi.
Ilajdı kafedra baslıǵı S.Matekeev ashıp berdi. Ol óz sózinde bul eki tariyxıy shaxstıń Ózbekstan hám Qaraqalpaqstan rawajlanıwındaǵı sheksiz ornı, ámelge asırǵan dóretiwshilik jumısları hám xalıq mápleri jolında etken xızmetlerin ayrıqsha atap ótti.
Atap aytqanda, Qállibek Kamalovtıń qaraqalpaq xalqı aldındaǵı xızmetleri, sonıń ishinde, joqarı bilimlendiriw mákemesiniń shólkemlestiriliwi, Qaraqalpaqstannıń 60 jıllıǵı múnásibeti menen kóp qabatlı turaq jaylardıń qurılısı, “Tashkent” miymanxanasınıń qurılısı, jańa jerlerdiń ózlestiriliwi sıyaqlı iygilikli jumısları tán alındı.
Sonday-aq, Sharaf Rashidovtıń Watanımızdıń rawajlanıwı, qaraqalpaq xalqınıń rawajlanıwı jolında ámelge asırǵan jumısları, onıń aǵartıwshılıq ideyaları hám jas áwladtı jetik kadrlar etip tárbiyalaw baǵdarındaǵı baslamaları ayrıqsha atap ótildi.
Ilaj dawamında bul eki ullı tulǵanıń qıyın hám sınawlı dáwirlerde xalıq hám Watan mápleri jolında etken pidákerlik xızmetleri búgingi jaslar ushın ibrat mektebi ekenligi atap ótildi.
