Áziz perzentlerim!
Qádirli muǵallim hám ustazlar! Húrmetli ata-analar! Bársheńizdi Watanımız ǵárezsizliginiń 35 jıllıq qutlı bayramı menen únles ótip atırǵan Bilimler kúni menen qızǵın qutlıqlayman. Usı quwanıshlı áyyyamda pák kózlerinde tańlanıw hám tolqınlanıw ushqınları jaynap, úlken arzıw-niyetler menen mektep bosaǵasına qádem qoyıp atırǵan 800 mıńǵa shamalas ul-qızlarımızǵa, ata-analar hám pedagoglar jámiyetshiligine ózimniń jaqsı tileklerimdi bildiremen. Jańa oqıw jılı mámleketimizdiń pútkil bilimlendiriw sistemasında, mektep, licey, texnikum hám joqarı oqıw orınlarımız turmısında jańa aǵartıwshılıq rawajlanıw jılı bolsın! Húrmetli bayram qatnasıwshıları! Sońǵı jıllarda tálim-tárbiya tarawında ámelge asırılıp atırǵan keń kólemli reformalarımız sebepli Jańa Ózbekstan mektepleri pútkilley jańasha kóriniske iye bolıp, bilimlendiriwdiń sapası jaqsılanıp atırǵanın bárshemiz kórip turmız. Mine, usınday ortalıqta ósip, kamalǵa kelip atırǵan, oqıw, kásiplik bilimlendiriw, IT, dóretiwshilik izlenisler, sport, jámiyetlik jumıslarda dáslepki jetiskenlikleri menen ata-analar hám ustazlardı quwantıp atırǵan ul-qızlarımız – biziń nurlı keleshegimiz, altın fondımız bolıp esaplanadı. Bunday bilimli, ziyrek, tırısqaq hám umtılıwshań, qatarları jıldan-jılǵa keńeyip atırǵan perzentlerimiz tımsalında biz Úshinshi Renessanstıń nálshelerin kóremiz. Olardıń hár birin gúllenip ósetuǵın ullı terek, aydın keleshegimizdiń tiregi etip tárbiyalaw – muqaddes wazıypamız. Álbette, bunday ullı maqsetlerge erisiwde bekkem tiykar bolıp xızmet etetuǵın tálim-tárbiya tarawın rawajlandırıwǵa biz bunnan bılay da tiykarǵı áhmiyetti qaratamız. Mektep qushaǵınan úlken ómirge jollama alatuǵın perzentlerimiz puqta bilim menen birge, álbette, keminde bir zamanagóy kásip-ónerdi iyelewi ushın barlıq sharayatlardı jaratamız. Bul ushın aymaqlarda “Kásipler qalashaları”n jaratıp, zamanagóy tájiriybe hám aldınǵı qánigelerdi tartamız. Áziz perzentlerim, sizlerge baxıtlı hám baxıtlı ómir esiklerin ashatuǵın gilt te, ómir jollarıńızda payda bolatuǵın quramalı sorawlardıń sheshimi de, sınaq hám mashaqatlardı jeńip ótiwdiń kepili de tek ǵana bilim, bilim hám bilim bolıp esaplanadı. Gózzal jaslıqtıń hár bir minutın qádirlep, jańa ilim, ideya hám innovaciyalardı, kásip hám ónerlerdi, ana tilimiz, bay tariyxımız hám mádeniyatımız tiykarların puqta iyeleń. Jáhán tariyxı hám shet tillerin de qunt penen úyreniń. Izleniw hám háreketten hesh qashan toqtamań. Ata-babalarımızdan miyras bolıp qalǵan teberik jerimizdi pútkil qálbińiz benen, júregińiz benen súyiń, xalqımız hám Watanımızǵa sheksiz sadıqlıq sezimleri menen jasań! Bul jolda mehriyban ustazlarıńız, ata-analarıńızdı eń jaqın dos hám keńesgóy dep biliń! Sizlerge jańa oqıw jılın ayrıqsha bahalar menen baslap, hár bir oqıw sheregin tabıslı juwmaqlaw, bekkem densawlıq, áwmet hám tabıslar yar bolıwın tileymen. Bilimler bayramı bársheńizge múbárek bolsın, áziz perzentlerim! Shavkat MIRZIYoEV, Ózbekstan Respublikası Prezidenti
