Qaraqalpaqstan Respublikası Pedagogikalıq sheberlik orayında ulıwma orta bilim beriw mákemeleri hám agentlikke qaraslı qánigelestirilgen mekteplerdiń pedagog-xızmetkerleri arasında «IV Dóretiwshi muǵallimler Olimpiadası»nıń Qaraqalpaqstan Respublikalıq basqıshı bolıp ótti.
Respublikamızdıń barlıq aymaqlarınan dóretiwshi muǵallimler qatnasqan tańlaw belgilengen shártler boyınsha ótkerilip, onda hár bir dóretiwshi topardıń islegen jumısları tájiriybeli tóreshiler tárepinen múnásip túrde bahalanıp barıldı.
Solay etip, qızıqlı ótken tańlaw shártleri juwmaǵında 39,7 ball toplaǵan Taxtakópir rayonındaǵı 3-sanlı ulıwma orta bilim beriw mektebiniń dóretiwshi muǵallimleri birinshi orındı iyelewge miyasar boldı hám tańlawdıń Ózbekstan Respublikası basqıshına jollamanı qolǵa kirgizdi.
Sonday-aq, birinshi orın iyelerine bilimlendiriw tarawınıń rawajlanıwına salmaqlı úles qosıp atırǵanı ushın Qaraqalpaqstan Respublikası Mektepke shekemgi hám mektep bilimlendiriwi ministrligi tárepinen «Qaraqalpaqstan Respublikası xalıq bilimlendiriw aǵlası» kókirek belgisi tapsırıldı.
Al, tańlawda 38,8 ball toplaǵan Kegeyli rayonı muǵallimleri ekinshi, 38,7 balldı qolǵa kirgizgen Qanlıkól rayonı muǵallimleri úshinshi orındı iyelewge eristi.
Sonıń menen birge, ilaj dawamında Qaraqalpaqstan Respublikası Ministrler Keńesi hám Qaraqalpaqstan Respublikası Milliy gvardiya basqarması tárepinen bilimlendiriw tarawında miynet etip atırǵan bir qatar pidayılar «Húrmet jarlıǵı» menen sıylıqlandı.
