Qaraqalpaqstan Respublikası Pedagogikalıq sheberlik orayınıń Metodikalıq xızmet kórsetiw bólimi metodistleri tárepinen Qaraqalpaqstan Respublikasındaǵı jańa bahalaw sistemasına ótken 33 ulıwma orta bilim beriw mektebi oqıwshılarınan shereklik summativ bahalaw ushın baqlaw jumısı ótkerilip atır. Baqlawda 5-11-klass oqıwshılarınıń 2024/2025-oqıw jılı I sherek juwmaqları boyınsha iyelegen bilim, kónlikpe hám uqıplılıqları qadaǵalawdan ótkerilmekte.
Summativ bahalaw:
Summativ bahalaw procesi sherek dawamında pánler ushın belgilengen háptelik saatlardan kelip shıǵıp, bólim boyınsha summativ bahalaw (BSB) úsh retge shekem, shereklik summativ bahalaw (ShSB) bir márte ótkeriledi. Bólim boyınsha bahalaw (BSB) sherek arasında belgili bir bólimler ótilip bolınǵannan soń, shereklik summativ bahalaw (ShSB) shereklik oqıw materialları ótilip bolınǵannan soń shólkemlestiriledi.
Hár bir pán boyinsha summativ bahalaw (BSB hám ShSB) materialları Qánigelestirilgen bilimlendiriw mákemeleri agentligi janındaǵı Pedagogikaliq sheberlik hám xalıqaralıq bahalaw ilimiy-ámeliy orayı tárepinen tayarlanıp, usınıs etiledi.
Summativ bahalawdı ótkeriw tártibi
Bahalawdıń ashıqlıǵın támiyinlew maqsetinde pánler boyınsha tiyisli summativ bahalaw barlıq parallel klasslar ushın birden-bir talaplar tiykarında ótkeriledi hám Oray tárepinen islep shıǵılǵan kriteriyalar tiykarında tekseriledi.
Shereklik summativ bahalaw kestesi sherek baslanaman degenshe ulıwma orta bilim beriw mákemesiniń metodikalıq keńesi sheshimi menen tastıyıqlanadı. Bunda, bir klasta bir oqıw kúni dawamında 3 pánnen artıq bolmaǵan hám ulıwma waqtı 5 saattan aspaǵan halda summativ bahalaw ámelge asırılıwın inabatqa alıw kerek.
Baqlaw juwmaǵı boyınsha oqıwshılardıń toplaǵan balları bir hápte múddet ishinde elektron jurnalǵa qoyıladı. Summativ bahalaw procesine sebepli jaǵdayda qatnasa almaǵan oqıwshılar ushın bahalawdı basqa waqıtta ótkeriwge ruxsat beriledi. Qayta tapsırıwdı shólkemlestiriw haqqında tolıq maǵlıwmat MShMBMniń 284-sanlı buyrıǵı qosımshasınıń 12-bántinde keltirilgen.
