Prezident Shavkat Mirziyoevtiń basshılıǵında bilimlendiriw tarawındaǵı reformalardıń orınlanıwı hám keleshektegi wazıypalarǵa baǵıshlanǵan videoselektor májilisi baslandı.
– Ekonomikanıń rawajlanıwı, elimiz hám perzentlerimizdiń keleshegi tek ǵana bilimlendiriw hám muǵallimge baylanıslı. Sizler menen jumıs baslaǵan birinshi kúnnen aytaman: bilimlendiriw, bilimlendiriw, bilimlendiriw, muǵallim, muǵallim, muǵallim, – dedi mámleketimiz basshısı.
Muǵallimge múnásip sharayat jaratıw, baqsha, mektep qurıw, úskenelew, shetten qánige alıp keliw, zamanagóy sabaqlıq hám oqıw baǵdarlamaların engiziw boyınsha júdá kóplegen sharayatlar jaratılǵanı hám bul jáne de dawam ettiriletuǵını atap ótildi.
– Biraq hár bir rayon, wálayat hákimi, biz perzentlerimizdi isenip tapsırǵan baqsha, mektep, texnikum, joqarı oqıw orınlarınıń basshıları bir haqıyqattı anıq biliwi zárúr.
Adamlarımız jaqsı jasawı ushın ekonomikamız kúshli bolıwı kerek! Onıń ushın jańa tovar, jańa xızmet, jańa texnologiya kerek! Bularǵa tek ǵana sapalı bilimlendiriw sisteması arqalı erise alamız! Basqa jolımız joq!
Usı haqıyqattı ańlap, hár kúni ózin qıynap islegen basshınıń rayonında, baqsha, mektebi, texnikumı, joqarı oqıw ornında álbette ózgeris hám nátiyje boladı! – dedi Prezident.
ÓzA
