Búgin Nókis qalasındaǵı “Aqquw” kompleksinde “Oraylıq Aziya pedagogları” xalıqaralıq forumınıń saltanatlı ashılıw máresimi bolıp ótti. Ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev, Ózbekstan Respublikası mektepke shekemgi hám mektep bilimlendiriwi ministri E’zozxon Karimova hám taraw wákilleri qatnasıp, elimizde Prezident Shavkat Mirziyoevtiń basshılıǵında bilimlendiriw tarawında ámelge asırılıp atırǵan keń kólemli reformalar, muǵallimlerdiń miynetin qádirlew hám bilimlendiriwdiń sapasın arttırıw baǵdarında alıp barılıp atırǵan jumıslar haqqında aytıp ótti. Forumda Oraylıq Aziya mámleketleriniń jetekshi pedagogları, Birlesken Milletler Shólkemi hám bir qatar xalıqaralıq shólkemlerdiń wákilleri, Kembridj universitetiniń qánigeleri, sonday-aq, Pedagogikalıq sheberlik orayı direktorınıń orınbasarları hám professor-oqıtıwshılar qatnaspaqta. Ilaj dawamında qatnasıwshılar bilimlendiriw tarawında aldınǵı tájiriybeler almasıw, zamanagóy pedagogikalıq qatnaslardı engiziw, regionallıq birge islesiwdi jáne de bekkemlew hám turaqlı bilimlendiriw sistemasın rawajlandırıw máselelerin dodalamaqta. “Turaqlı keleshek – ekologiyalıq bilimlendiriwden baslanadı” ideyası astında ótkerilip atırǵan bul xalıqaralıq forum bilimlendiriw tarawındaǵı regionallıq birge islesiwdi bekkemlew, aldınǵı tájiriybelerdi almasıw hám pedagoglardıń kásiplik potencialın bunnan bılay da rawajlandırıwǵa xızmet etpekte. Forum sheńberindegi ilajlar dawam etpekte.
