2025-jıl 12-19-oktyabr kúnleri Ázerbayjan Mámleketlik Pedagogikalıq Universiteti Guba filialında “Inklyuziv bilimlendiriw hám STEAM texnologiyaları: xalıqaralıq tájiriybe hám aldınǵı bilimlendiriw modelleri” temasında xalıqaralıq qánigelik arttırıw kursları bolıp ótpekte.
Bul qánigelik arttırıw baǵdarlamasında Qaraqalpaqstan Respublikası Pedagogikalıq sheberlik orayınıń professor-oqıtıwshıları – Bayram Utemuratov, Gulmari Smaylova, Ixtiyor Utepov hám Tumaris Aymuxammedovalar qatnaspaqta.
Bul xalıqaralıq oqıw seminarı sheńberinde bilimlendiriw tarawında alıp barılıp atırǵan aldınǵı xalıqaralıq tájiriybeler, innovaciyalıq kózqaraslar hám zamanagóy STEAM texnologiyalarınıń oqıw procesine integraciyası boyınsha teoriyalıq hám ámeliy bilimler berilmekte.
Sonday-aq, inklyuziv tálimniń mazmun-mánisi, onı nátiyjeli shólkemlestiriw mexanizmleri hám sırt ellerdiń tájiriybesinde qollanılıp atırǵan aldınǵı metodlar boyınsha tereńlestirilgen oqıw shınıǵıwları alıp barılmaqta.
