Qaraqalpaqstan Respublikası Pedagogikalıq sheberlik orayı “Tillerdi oqıtıw metodikası” kafedrası hám Nókis qalasındaǵı Prezident mektebi menen birgelikte “Prezident mektebi modelin ulıwma bilim beriw mektebi tájiriybesine engiziw jolları” temasında sheberlik sabaǵı ótkerildi. Ilaj dawamında ulıwma orta bilim beriw mekteplerinde qaraqalpaq tili hám ádebiyatı sabaqların Kembridj tájiriybesi úlgisinde shólkemlestiriwdiń nátiyjeli metodikalıq usılları hám ámeliy tájiriybeleri usınıldı. Seminar-treningtıń tiykarǵı maqseti – zamanagóy pedagogikalıq texnologiyalardı oqıw procesine engiziw arqalı oqıwshılardıń sın kózqarastan hám dóretiwshilik pikirlew qábiletlerin rawajlandırıw, sonday-aq, oqıtıwshılardıń kásiplik sheberligin arttırıwdan ibarat boldı. Sabaqlardı Pedagogikalıq sheberlik orayı Tillerdi oqıtıw metodikası kafedrasınıń oqıtıwshısı Gúlistan Qanatova hám Prezident mektebiniń joqarı kategoriyalı qaraqalpaq tili hám ádebiyatı páni muǵallimi Xurlixan Abdijabbarova birgelikte alıp bardı. Ilaj dawamında muǵallimlerge Prezident mektebi tájiriybesin ulıwma orta mektepler sharayatında nátiyjeli beyimlestiriw jolları hám innovaciyalıq oqıtıw texnologiyaların qollanıw imkaniyatları kórsetildi.
