Qaraqalpaqstan Respublikası Pedagogikalıq sheberlik orayında Tillerdi oqıtıw metodikası kafedrası tárepinen tuwısqan qazaq xalqınıń milliy bayramlarınan biri bolǵan Amal bayramı hám Kóriw kúni múnásibeti menen “”KÓRISIW – TINISHLIQ HÁM RUWXIY JAŃALANÍWDÍŃ BASLANÍWÍ” atamasında ádebiy-kompoziciyalıq bayram keshesi shólkemlestirildi.
Ilajda Pedagogikalıq sheberlik orayınıń direktorı Gulistan Kojabaeva shıǵıp sóylep, “Amal” bayramı – Nawrızdıń jarshısı, jańalanıw hám oyanıw tımsalı ekenin atap ótip, bársheni usı qutlı bayram menen qızǵın qutlıqladı. Sonday-aq, ol bul bayramnıń milletleraralıq tatıwlıqtı bekkemlewdegi áhmiyetine ayrıqsha toqtap ótti.
— “Amal” bayramı yamasa Kóriw – tuwısqanlar tatıwlıǵı hám xalıqlar awızbirshiliginiń ayqın kórinisi bolıp esaplanadı. Bul dástúr tuwısqanlar arasındaǵı miyrim-shápáátti bekkemlep, insanlardı bir-birine jaqınlastıradı. Bul kúnde adamlar bir-birine jaqsı tilekler bildirip, alǵıslar aytadı, – deydi kafedra oqıtıwshısı Gulistan Qanaatova.
Ilaj sheńberinde qazaq xalqınıń áwladtan-áwladqa ótip kiyatırǵan ónermenchilik úlgileri, milliy taǵamları hám milliy kiyimleriniń kórgizbesi shólkemlestirildi. Sonday-aq, qábiletli jaslardıń atqarıwında qosıqlar, milliy ayaq oyınlar, aqınlardıń aytısı hám hár qıylı saxnalıq kórinisler kórsetilip, ádebiy-kompoziciyalıq bayram keshesi kóterińki ruwxta ótti. 
