Ózbekstan Respublikası Prezidentiniń 2025-jıl 3-noyabrdegi “Xalıqtıń salamatlıǵın hám millet genofondın náshebentlik hám narkojınayatshılıqtan nátiyjeli qorǵaw boyınsha kompleksli ilajlar haqqında”ǵı PP-207-sanlı Pármanına tiykarlanıp Qaraqalpaqstan Respublikası Ministrler Keńesi tárepinen islep shıǵılǵan hám tastıyıqlanǵan is-ilajlar baǵdarlamasınıń 7-bántiniń orınlanıwın támiyinlew maqsetinde Qaraqalpaqstan Respublikası Pedagogikalıq sheberlik orayında “Social-ekonomikalıq pánler metodikası” kafedrasınıń docenti S.Usenov tárepinen baslawısh tálim baǵdarı tıńlawshıları ushın “Náshebentlik zatlardıń nızamsız aylanısı hám oǵan qarsı gúresiwde huqıqıy immunitetti qáliplestiriw” temasında ashıq sabaq shólkemlestirildi. Ashıq sabaqqa oray direktorı Gulistan Kojabaeva hám direktor orınbasarları, oray professor-oqıtıwshıları qatnastı. Ashıq sabaqtıń tiykarǵı maqseti: tıńlawshılarda náshebentlik qurallarınıń unamsız aqıbetleri haqqında huqıqıy bilim hám sananı bekkemlew, jaslarda usı illetke qarsı bekkem huqıqıy immunitetti qáliplestiriwden ibarat. Sabaq barısında: náshebentliktiń insan salamatlıǵına keltiretuǵun zıyanı; onıń jámiyet hám shańaraq turaqlılıǵına unamsız tásiri; jınayatshılıq hám huqıqbuzarlıqlardıń kelip shıǵıwına sebep bolıwı; náshebentlik qurallarıdıń nızamsız aylanısı ushın nızamshılıqta belgilengen juwapkershilik ilajları haqqında hár tárepleme maǵlıwmatlar berildi. Ashıq sabaq juwmaǵında bilimlendiriw mákemeleri hám máhállelerde náshebentliktiń unamsız aqıbetleri, salamat turmıs tárizin úgit-násiyatlaw hám huqıqıy profilaktikalıq jumısların dawam ettiriw boyınsha usınıslar berildi.
