📊Qaraqalpaqstan Respublikası Pedagogikalıq sheberlik orayında xalıqaralıq tájiriybelerdi úgit-násiyatlaw hám aldınǵı bilimlendiriw texnologiyaların engiziwge baǵıshlanǵan seminar-trening shólkemlestirildi.
Seminarǵa Qaraqalpaqstan Respublikası Pedagogikalıq sheberlik orayınıń direktorı Gulistan Kojabaeva qatnasıp, búgingi kúnde sırt ellerdiń aldınǵı tájiriybelerin úyreniw hám olardı milliy bilimlendiriw sistemasına nátiyjeli engiziw bilimlendiriwdiń sapasın arttırıwdıń áhmiyetli faktorlarınan biri ekenligin atap ótti. Sonday-aq, xalıqaralıq birge islesiw pedagoglardıń kásiplik kompetenciyaların rawajlandırıw, zamanagóy pedagogikalıq qatnaslardı ámeliyatqa engiziw hám bilimlendiriw procesin jańa basqıshqa alıp shıǵıwda ayrıqsha áhmiyetke iye ekenin atap ótti.
Seminar-treningte Franciya hám Túrkiyada ótkerilgen xalıqaralıq tájiriybe arttırıw baǵdarlamalarında qatnasıp qaytqan professor-oqıtıwshılar óz tájiriybeleri menen ortaqlastı.
Seminar dawamında Franciya bilimlendiriw sistemasında qollanılıp atırǵan zamanagóy pedagogikalıq qatnaslar, bilimlendiriwdiń sapasın arttırıw mexanizmleri hám oqıtıwshılardıń kásiplik rawajlanıwına qaratılǵan aldınǵı tájiriybeler haqqında maǵlıwmat berildi.
Sonday-aq, Túrkiyanıń Stambul qalasında shólkemlestirilgen “Empowering Educators: Innovative Strategies for Teaching Teachers” xalıqaralıq kásiplik rawajlanıw baǵdarlaması sheńberinde úyrenilgen innovaciyalıq metodlar, nátiyjeli bilimlendiriw strategiyaları hám xalıqaralıq tájiriybeler tanıstırıldı.
Ámeliy sabaqlarda TAGUL bilimlendiriw baǵdarlamaları tiykarındaǵı tapsırmalar, “Blind Artist” treningi jáne jámáátlik birge islesiw, kreativ pikirlew hám nátiyjeli sóylesiw kónlikpelerin rawajlandırıwǵa qaratılǵan interaktiv shınıǵıwlar shólkemlestirildi. Xalıqaralıq tájiriybe – sapalı bilimlendiriw hám professional rawajlanıwdıń áhmiyetli faktorı!
