Ózbekstan Respublikası Prezidentiniń 2022-jıl 11-maydaǵı “2022-2026-jılları xalıq bilimlendiriwin rawajlandırıw boyınsha Milliy baǵdarlamanı tastıyıqlaw haqqında”ǵı PF-134-sanlı Pármanında baslawısh klaslar ushın zamanagóy sabaqlıq, shınıǵıw dápteri hám oqıtıwshılar ushın metodikalıq qollanbalar islep shıǵıw wazıypası berilgen. Sonday-aq, 2023-2024-oqıw jılınan baslap 1-klastan baslap “Informatika hám informaciyalıq texnologiyalar” páni oqıtıla basladı. 
Ulıwma orta bilim beriw mektepleriniń baslawısh klass oqıtıwshıları ushın bul jańa pán bolıp tabıladı. Baslawısh klass oqıtıwshılarınıń “Informatika hám informaciyalıq texnologiyalar” pánin sapalı oqıtıwı ushın jańa bilim hám kónlikpeler talap etiledi. Olar turaqlı túrde óz ústinde jumıs alıp barıp, qánigeliklerin arttırıp barıwı kerek. Qaraqalpaqstan Respublikasınıń baslawısh klass oqıtıwshılarına arnawlı qánigeligin arttırıw kursları shólkemlestiriledi. “Informatika hám informaciyalıq texnologiyalar” pánine baylanıslı programmalardı úyretiw menen birge IT boyınsha qánigeler de sabaq alıp barıw ushın tartıladı.
14-16-fevral kúnleri aralıǵında Qaraqalpaqstan Respublikası Pedagoglardı jańa metodikalarǵa úyretiw milliy orayında Baslawısh klass oqıtıwshıları ushın “Informatika hám informaciyalıq texnologiyalar” pánin oqıtıw metodikası boyınsha 18 saatlı biypul kurslar shólkemlestirilmekte. Oǵan respublikamızdaǵı ulıwma orta bilim beriw mekteplerindegi 30 baslawısh klass oqıtıwshıları qamtıp alındı. Baslawısh klass oqıwshılarına bilim hám tarbiya beriwde XXI ásir kónlikpelerin qáliplestiriw kerek. Mine usı máseleler islep shıǵılǵan jańa “Informatika hám informaciyalıq texnologiyalar” sabaǵında óz sáwleleniwin tapqan. Zamanagóy bilimlendiriw dúnyadaǵı ózgerislerge beyimlesiwsheń, hár qıylı mashqala hám tosıqlarǵa tayar turatuǵın professionallardıń jańa áwladın qáliplestirmekte. Bunday bilimlendiriw tiykarında oqıwshılardı tek ámeliy kónlikpeler menen emes, al oqıwshılarǵa búgingi kúnde zárúr bolǵan IT texnologiyaları menen islew kónlikpeleri qáliplesedi, zamanagóy kompetenciyalar rawajlanadı.
Onda baslawısh klass oqıtıwshılarına Pedagogikalıq oraydıń professor-oqıtıwshıları Bayram Ótemuratov, Dilfuza Qutlımuratova hám Quwatbay Turmanovlar tárepinen “Informatika hám informaciyalıq texnologiyalar” pánine baylanıslı programmalardı úyretiw menen birge IT tarawındaǵı bilimlerin bekkemlep, jaratılǵan imkaniyatlardan nátiyjeli paydalanıw usılları úyretilmekte.
