Qaraqalpaqstan Respublikası Pedagoglardı jańa metodikalarǵa úyretiw milliy orayında “Pedagogika, psixologiya hám tálim texnologiyaları metodikası” kafedrası tárepinen “Ulıwma bilim beriw mekteplerinde inklyuziv tálimdi basqıshpa-basqısh shólkemlestiriw, mashqala hám sheshimler” temasında seminar-trening ótkerildi.
Inklyuziv tálimniń maqseti – imkaniyatı sheklengen oqıwshılar ushın mektepte arnawlı metodlardı qollanıw arqalı arnawlı pedagoglardı qosqan halda qıyınshılıqsız maslastırılǵan bilimlendiriw ortalıǵın jaratıw, olardıń jámiyetke nátiyjeli biyimlesiwi, kelisiwine xızmet etetuǵın sıpatlı ulıwma orta bilim beriwdi támiyinlewden ibarat.
Ilajda qánigeler tárepinen inklyuziv tálimdi shólkemlestiriw adamgershilikli, ulıwma insanıylıq qádiriyatlar, mehribanlıq principlerge tiykarlanıp ámelge asırıwdı jáne inklyuziv tálimde – oqıtıwshı oqıwshılardıń túrli taypada ekenligine qaramay barlıq balalardıń huqıqın qorǵaw hám húrmet etiwi zárur ekenligin aytıldı. Ata-analar menen birge islewde ózine tán formalarına: Birge islesiw (ata-analarınıń) qızıǵıwshılıǵın itibarǵa alıwın, óz balalarınıń psixologiyalıq rawajlanıwın baqlap barıwın, olardı korrekciya jumıslarına aktiv qatnastırıw kerekligin, ata-analardıń óz balalarına bolǵan múnásibetin, ózgertirip, olardı tárbiyalıq usıllar menen qurallandırıw zárurligin, ata-anaların balasınıń tárbiyasına qaratıw maqsetinde olarǵa defektologiyalıq, psixologiyalıq ámeliyatınıń ápiwayı kórinislerin úyretip barıw, sonday-aq, dógerek jumıslarına imkaniyatı sheklengen balalardı tartıw, olardıń keleshektegi turmısı ushın júdá áhmiyetli, paydalı ekenligin aytıp ótildi.
Bunnan soń Pedagogikalıq oraydıń oqıtıwshıları Q. Klichev hám A. Berdimuratovalar tárepinen “Inklyuziv tálim boyınsha xalıq aralıq hám milliy normativlik-huqıqıy hújjetler, olardıń mazmun hám mánisi» haqqında toqtap ótti. Birlesken milletler shólkeminiń insan huqıqları ulıwma deklaraciyasi -BMSh Bas Assambleyası tárepinen 1948-jıl 10-dekabrde qabıl etilgen deklaraciya hám BMSh tárepinen 1989 – jılda islep shıǵılǵan “Balalar huqıqları haqqındaǵı” Konvenciya hámme balalardı, sol qatarı imkaniyatı sheklengen balalar huqıqların da qorǵaydı hám qollap – quwatlaydı. BMSh niń 2006 – jıl 13-dekabrde qabıl etilgen hám 2008-jıl 3-mayda kúshke kirgen “Imkaniyatı sheklengen balalar huqıqları haqqında”ǵı konvenciyasında: imkaniyatı sheklengen balalar ózligin húrmet etiw, mayıplıqtıń kelip shıǵıwı dárejesine qaramastan, puqara óz jasındaǵı tenlesleri menen birdey huqıqlarǵa iye bolıwı, olar múmkin bolǵanınsha jaqsı turmısta jasawı ushın elimizde barlıq múmkinshilikler jaratılıp berilip atırǵanlıǵın aytıp ótti.
