Usı jıl 31-oktyabr kúni Qaraqalpaqstan Respublikası Pedagogikalıq sheberlik orayında Qaraqalpaqstan Respublikasına xızmet kórsetken xalıq bilimlendiriw xızmetkeri, fizika-matematika ilimleri kandidatı, docent K.J. Dauletiyarovtıń tuwılǵanına 70 jıl tolıw múnásibeti menen “Qaldırǵan iziń máńgilik, Ustaz!” atamasındaǵı eslew keshesi ótkerildi.
Ilajdı «Anıq hám tábiyiy pánler metodikası» kafedrası baslıǵı docent, Q.Turmanov ashıp berdi hám Kenesbay Dauletiyarovtıń miynet jolı onıń izde qaldırǵan ibratlı isleri haqqında eske aldı. Bunnan soń pedagogika ilimleri kandidatı, docent I.Pirniyazov, Úzliksiz kásiplik bilimlendiriwdi shólkemlestiriw bólimi baslıǵı B.Xudaybergenov hám aǵa oqıtıwshı T.Baltabaevlar ilimpaz-pedagogtıń ómiri hám ilimiy-pedagogikalıq xızmetleri haqqında bayanat jasadı.
Eslew keshesinde K.Dáwletiyarovtıń shákirtleri, tuwǵan-tuwısqanları da shıǵıp sóylep, onıń jaqsı pazıyletlerin eske aldı.
K. Dauletiyarov 2001-jılı K.Ubaydullaev atındaǵı pedagog kadrlardı qayta tayarlaw hám qánigeligin arttırıw institutında kafedra baslıǵı, Oqıw isleri boyınsha prorektor, ómiriniń aqırǵı kúnlerine shekem Qaraqalpaqstan Respublikası Pedagogikalıq sheberlik orayı «Anıq hám tábiyiy pánler metodikası» kafedrası baslıǵı lawazımında jumıs isledi.
Ol ustazlıq etiw menen birge ilimiy-izertlew jumısları menen keń shuǵıllandı. Qaysı lawazımda islese de, ózin miynetsúygish, tereń bilimli, istiń kózin biletuǵın sheber shólkemlestiriwshi sıpatında tanıta bildi hám xalqımız arasında úlken húrmet-izzetke iye boldı. Kenesbay Dauletiyarov tıńlawshılardıń mámleketlik bilimlendiriw talapları dárejesinde bilim, kónlikpe hám uqıplılıqlardı tolıq ózlestiriw ushın jeterli sharayattı jaratıp beriwde óz úlesin qostı. Óziniń shólkemlestiriwshilik uqıbı, miynet súygishligi, talapshańlıǵı menen kózge túsip, kásiplesleri arasında úlken abırayǵa eristi. Onıń islegen miynetleri húkimetimiz tárepinen ılayıqlı bahalanıp «Qaraqalpaqstan Respublikasına miyneti sińgen bilimlendiriw xızmetkeri» mámleketlik ataǵı, Ózbekstan hám Qaraqalpaqstan Xalıq bilimlendiriw aǵlası kókirek nıshanları menen sıylıqlandı. Kenesbay Dauletiyarov aramızda bolǵanda áyne 70 jastı qarsı alǵan bolar edi.
