Úsh mıń jıldan aslam óz tariyxına iye Nawrız bayramı xalqımızdıń eń ullı bayramlarınıń biri bolıp, bul kúndi ázelden ata-babalarımız jańa jıldıń bası sıpatında kóterińki keypiyatta kútip alǵan. Búgin Qaraqalpaqstan Respublikası Pedagogikalıq sheberlik orayında «Qádiriyatlarıń máńgi bolsın–Nawrız!» súreni astında bayram ilajı ótkerildi.
Bayram ilajında Qaraqalpaqstan Respublikası Pedagogikalıq sheberlik orayı direktorı Venera Bekmuratova qatnasıwshılardı jıl bası esaplanǵan Nawrız benen qızǵın qutlıqlap, bıyılǵı jıldıń xalqımız ushın jaqsı hám bereketli jıl bolıp keliwin tiledi.
Ulıwmaxalıqlıq seyilge aylanǵan Nawrız bayramında tıńlawshılar tárepinen milliy taǵamlar hám buyımlar kórgizbesi, ata-babalarımızdan miyras bolıp kiyatırǵan dástúrlerimizdi sáwlelendiriwshi úrp-ádet hám salt-dástúrlerimiz kórsetildi. Ózleriniń eń jaqsı ónerlerin kórsetken kafedralar hám tıńlawshılarǵa Pedagogikalıq sheberlik orayı jámááti tárepinen múnásip túrde xoshametlendi. Bayram ilajında xalqımızdıń milliy sport túrlerinen esaplanǵan tas kóteriw, arqan tartıs, jarıslar ótkerilip, jeńimpaz bolǵan sportshılar bahalı estelik sawǵaları menen sıylıqlandı. Nawrız seyili tıńlawshılar tárepinen tayarlanǵan yoshlı koncert baǵdarlaması menen kewilli dawam etti.
