Педагогикалық шеберликти раўажландырыў мәселелери додаланды

Usı jıl 16-may kúni Pedagogikalıq sheberlik orayında “Jańa shoqqılar – bilimlendiriwde izleniwshilik hám dóretiwshilik” atamasında respublikalıq ilimiy-ámeliy konferenciya óz jumısın basladı. Konferenciyada basshı hám pedagog kadrlardıń qánigeligin arttırıwǵa qánigelesken institutlar, oraylar, joqarı bilimlendiriw mákemeleriniń professor-oqıtıwshıları, ulıwma bilim beriw mákemeleriniń basshıları hám oqıtıwshıları, jas ilimpazlar, izertlewshiler, bilimlendiriw sistemasın basqarıw uyımlarınıń xızmetkerleri, bilimlendiriw tarawında jumıs alıp baratuǵın xalıqaralıq hám sırt el shólkemleriniń wákilleri qatnastı. Konferenciyanıń maqseti – pedagogikalıq tájiriybe almasıw, zamanagóy bilimlendiriw texnologiyaların engiziw hám XXI ásirde bilimlendiriw procesinde jańasha qatnaslardı dodalawdan ibarat. Onda muǵallimlerdiń kásiplik tayarlıq dárejesi, proffesional kompetentligi hám pedagogikalıq sheberligin turaqlı rawajlandırıp barıw sıyaqlı máselelerdi hár tárepmele tereń analizlew názerde tutılǵan. Konferenciyada Qaraqalpaqstan Respublikası Pedagogikalıq sheberlik orayı direktorınıń orınbasarı B.Iztilewov, A.Avloniy atındaǵı pedagogikalıq sheberlik milliy institutınıń Pedagogikalıq innovaciyalar boyınsha prorektorı Sh.Rajabov, Nókis qalası Prezident mektebiniń oqıtıwshıları Celo Velonkosini Zulu hám Abdul Basit Abro hám basqalar shıǵıp sóylep, ótkerilip atırǵan ilajdıń áhmiyetine keńnen toqtap ótti. Konferenciyada qatnasıwshılar sekciyalarǵa bólinip, onda pedagogikalıq sheberlik – bilimlendiriwdiń sapasın arttırıwdıń áhmiyetli faktorı, anıq hám tábiyǵıy pánler boyınsha muǵallimlerdiń pedagogikalıq sheberliklerin rawajlandırıw mashqalaları, XXI ásir sharayatında filologiya pánlerin oqıtıw máseleleri, sociallıq pánlerdi oqıtıwda pedagogikalıq innovaciyalar hám dóretiwshilik, baslawısh bilimlendiriwde pedagoglardıń kásiplik sheberliklerin rawajlandırıwda xalıqaralıq tájiriybelerdi en jaydırıw, úzliksiz kásiplik rawajlandırıw procesinde pedagogikalıq-psixologiyalıq qatnaslar boyınsha máselelerdi dodalap, óz jumısın dawam etti.