Mektepke shekemgi hám mektep bilimlendiriwi ministriniń 2025-jıl 30-iyundaǵı 216-sanlı hám 8-sentyabrdegi 336-sanlı buyrıqlarına muwapıq, usı oqıw jılınan baslap ulıwma orta bilim beriw mákemelerinde pedagoglar ushın “Kásiplik rawajlanıw kúni” hám “Kásiplik rawajlanıw saatı” ilajları jolǵa qoyıldı.
Bul ilajlar oqıtıwshılardıń kásiplik potencialın arttırıw, aldınǵı pedagogikalıq tájiriybelerdi úyreniw hám oqıtıw procesine zamanagóy metodikalıq qatnaslardı engiziw imkaniyatın beredi.
Bul processlerdiń nátiyjeli shólkemlestiriliwin támiyinlew maqsetinde Qaraqalpaqstan Respublikası Pedagogikalıq sheberlik orayınıń metodistleri tárepinen orınlarda metodikalıq járdem kórsetilip, ámeliy másláhátler berilmekte.
Búgin tayanısh mekteplerde tariyx páni boyınsha “Kásiplik rawajlanıw kúni” shólkemlestirilmekte. Ilaj dawamında oqıtıwshılar sociallıq pánlerdi oqıtıwda zamanagóy pedagogikalıq texnologiyalar, interaktiv metodlar hám innovaciyalıq qatnaslardı qollanıw boyınsha tájiriybe almaspaqta. Sonday-aq, oqıwshılarda tariyxıy pikirlewdi qáliplestiriw, erkin pikirlewdi rawajlandırıw hám milliy qádiriyatlarǵa húrmet ruwxında tárbiyalaw máseleleri dodalanbaqta.
“Kásiplik rawajlanıw kúni” muǵallimlerdiń óz ústinde turaqlı islewi, kásiplik kompetenciyaların rawajlandırıw hám bilimlendiriwdiń sapasın arttırıwǵa xızmet etetuǵın áhmiyetli maydan sıpatında tán alınadı.
