2025-jıl 15-oktyabr kúni Qaraqalpaqstan Respublikası Pedagogikalıq sheberlik orayında ǵalaba xabar quralları wákilleri ushın media-tur shólkemlestirildi.
Ilaj mektepke shekemgi bilimlendiriw tarawın rawajlandırıw, pedagog kadrlardıń kásiplik potencialın arttırıw, sonday-aq, zamanagóy oqıw-metodikalıq processler menen ǴXQ wákillerin jaqınnan tanıstırıw maqsetinde ótkerildi.
Media-tur dawamında oraydıń jumısı, úzliksiz kásiplik rawajlanıw kurslarınıń jolǵa qoyılıwı, sabaq processlerinde professor-oqıtıwshılar tárepinen qollanılıp atırǵan aldınǵı hám innovaciyalıq pedagogikalıq texnologiyalar, sonday-aq, tıńlawshılar ushın jaratılǵan zamanagóy oqıw ortalıǵı hám texnikalıq infrastruktura menen tanıstırıldı.
Bul oray Ózbekstan Respublikası Mektepke shekemgi hám mektep bilimlendiriwi ministrligi, Islam rawajlanıw banki hám UNICEF menen birgelikte ámelge asırılıp atırǵan “Ózbekstanda sapalı mektepke shekemgi bilimlendiriwden paydalanıw imkaniyatların keńeytiw” joybarı sheńberinde shólkemlestirilgen.
Oray YUNISEF tárepinen usınıs etilgen zamanagóy texnikalıq úskeneler menen tolıq támiyinlengen bolıp, mektepke shekemgi bilimlendiriw sisteması xızmetkerleri ushın zárúr bolǵan teoriyalıq hám ámeliy sabaqlardı joqarı dárejede shólkemlestiriwge xızmet etedi.
