Búgingi kúnde shet el tájiriybelerin úyreniw hám xalıqaralıq imkaniyatlardı keńeytiw — bilimlendiriw tarawın jańa basqıshqa alıp shıǵıwdıń tiykarǵı kepili bolıp tabıladı. Usı baǵdarda Qaraqalpaqstan Respublikası Pedagogikalıq sheberlik orayında professor-oqıtıwshılar hám metodistler ushın “Franciya bilimlendiriw sistemasında aldıńǵı tájriybeler hám olardı ámelge engiziw jolı” temasında seminar-trening shólkemlestirildi. Seminardı Franciyanıń Nicca (Nice) qalasındaǵı Frankofoniya oqıw orayında ótkerilgen arnawlı kurslarda qatnasıp, xalıqaralıq tájiriybe arttırıp qaytqan maman qánigelerimiz — Pedagoglardı kásiplik rawajlandırıw boyınsha orınbasarı B. Iztileuov hám Social-ekonomikalıq pánler metodikası kafedrasınıń baslıǵı R. Bauetdinovlar alıp bardı. Seminar dawamında qatnasıwshılar tek ǵana teoriyalıq bilimler menen sheklenbegen halda, Franciya bilimlendiriw sistemasınıń oqıtıw usılları hám metodikası boyınsha ámeliy shınıǵıwlarda qatnastı. Ilaj juwmaǵında professor-oqıtıwshılar hám metodistler tárepinen xalıqaralıq tájiriybe hám innovacion metodlardı jergilikli oqıw processine maslastırıw, sonday-aq, bilimlendiriw sapasın asırıw boyınsha keleshektegi qádemler birgelikte dodalandı.
