Ózbekstan Respublikası Prezidentiniń 2026-jıl 15-yanvardaǵı “Kitapqumarlıq mádeniyatın rawajlandırıw hám xalıq arasında kitap oqıwǵa qızıǵıwshılıqtı arttırıw ilajları haqqında”ǵı PQ-9-sanlı qararı hám Mektepke shekemgi hám mektep bilimlendiriwi ministrliginiń 2026-jıl 5-marttaǵı 89-sanlı buyrıǵınıń orınlanıwın támiyinlew maqsetinde Nókis rayonında respublika kólemindegi kitapxanashılar ushın oqıw-seminarı shólkemlestirildi. Bul seminar Social-ekonomikalıq pánler metodikası kafedrası oqıtıwshıları G. Ubbiniyazova hám de Málimleme-resurs orayı bas qánigesi H. Shamshetovalar tárepinen alıp barıldı. Ilajda mektep kitapxanalarınıń jumısın jetilistiriw, kitapqumarlıq mádeniyatın rawajlandırıw hám zamanagóy kitapxana xızmetlerin engiziw máselelerine ayrıqsha itibar qaratıldı. Seminar dawamında tómendegi áhmiyetli baǵdarlar boyınsha ámeliy usınıslar berildi: mektep hám bilimlendiriw mákemelerinde “Kitap oqıw saatları”n tastıyıqlanǵan reje tiykarında nátiyjeli shólkemlestiriw; barlıq paydalanıwshılar, sonıń ishinde, shetki aymaqlarda jasaytuǵın oqıwshılar ushın kitapqumarlıqqa teń imkaniyatlar jaratıw; oqıwshılar hám pedagoglar arasında “Eń belsendi kitapqumar” tańlawların turaqlı ótkeriw; elektron kitapxana xızmetlerin rawajlandırıw hám olardan nátiyjeli paydalanıw metodikasın jetilistiriw; klasslar hám bólimlerde mobil kitapxanalar, kóshpeli kitap kórgizbeleri jáne zamanagóy “Kitap múeshleri”n shólkemlestiriw. Seminar juwmaǵında qatnasıwshılar óz-ara tájiriybe almasıp, kitapqumarlıq mádeniyatın bunnan bılay da rawajlandırıw hám kitapxana jumısın jetilistiriwge qaratılǵan perspektivadaǵı wazıypalar boyınsha pikir-usınısların bildirdi.
