Mektepke shekemgi hám mektep bilimlendiriwi ministrligi, Respublikalıq bilimlendiriw orayı hám bir qatar sırt el shólkemleri menen birgelikte Jetilistirilgen Milliy oqıw baǵdarlamasın rásmiy usınıs etiwge baǵıshlanǵan prezentaciya ilajı bolıp ótti.
Onda Ózbekstan Respublikası Prezidenti Administraciyası basshısınıń bilimlendiriwdi reformalaw boyınsha orınbasarı bóliminiń joybar koordinatorı YUliya Risyukova, Ministrdiń birinshi orınbasarı Sherzod Karimov shıǵıp sóylep, usı joybar sheńberinde erisilgen nátiyjeler hám rejeler haqqında aytıp ótti.
Ilajda, sonday-aq, UNICEF shólkeminiń Ózbekstandaǵı wákilxanasınıń basshısı Regina Mariya Kastijio, Respublikalıq Bilimlendiriw orayınıń direktorı Dilshoda Norboeva hám birge islesiwshi shólkemlerdiń wákilleri qatnastı.
Maǵlıwmat ornında: Jetilistirilgen Milliy oqıw baǵdarlamasında barlıq oqıwshılar ushın anıq oqıw maqsetleri belgilengen bolıp, derlik eki jıl dawamında 147 milliy hám 30 xalıqaralıq qánigelerdiń qatnasıwında islep shıǵıldı.
Process dálillerge tiykarlanǵan qatnas tiykarında shólkemlestirilip, onıń sheńberinde 260 tan aslam jumısshı ushırasıw hám másláhátlesiwler ótkerildi.
Aldınǵı xalıqaralıq tájiriybe hám ekspert potencialına súengen halda shólkemlestirilgen bul processtiń áhmietli tárepi sonda, birinshi márte barlıq pánler boyınsha milliy jumısshı toparlar xalıqaralıq ilim ekspertleri menen sistemalı hám úzliksiz birge islesti.
