Qaraqalpaqstan Respublikası Pedagogikalıq sheberlik orayında 21-oktyabr — Ózbek tili bayramı kúni múnásibeti menen “Jáhán minberinde jańlaǵan tilim” atamasında ruwxıy-aǵartıwshılıq ilaj shólkemlestirildi. Ilaj Ózbekstan Respublikası hám Qaraqalpaqstan Resublikasınıń mámleketlik gimnleri menen baslandı. Tillerdi oqıtıw metodikası kafedrası baslıǵı, filologiya ilimleriniń kandidatı Seyitjan Matekeev ilajdı kiris sóz benen ashıp berip, “Mámleketlik til – puqaralardı birlestiriwshi joqarı qádiriyat” temasında sóz etip, mámleketlik tildiń xalıqtı birlestiriw, milliy qádiriyatlardı saqlaw hám jámiyette awızbirshilikti bekkemlewdegi áhmiyetin atap ótti. Ilaj dawamında Nókis mámleketlik pedagogikalıq institutı (NMPI) Ózbek tili kafedrası oqıtıwshısı, PhD O.Haytbaev “Ózbek tili rawajlanıwınıń huqıqıy tiykarları,” Qaraqalpaqstan Respublikası Pedagogikalıq sheberlik orayı Tillerdi oqıtıw metodikası kafedrası docenti G.Qanaatova bolsa “Ózbek tiliniń túrkiy tiller arasındaǵı ornı” temasında bayanatlar menen qatnastı. Sonday-aq, tıńlawshılar tárepinen tayarlanǵan qosıqlar, ayaq oyınlar, viktorinalar hám kórkem shıǵıwlardan ibarat ádebiy-kórkem kompoziciya kórsetildi.
