Paytaxtımızdaǵı Qaraqalpaq mámleketlik jas tamashagóyler teatrında Qaraqalpaqstan Respublikası Mektepke shekemgi hám mektep bilimlendiriӯ ministrligi hám Respublikalıq bilimlendiriӯ orayı tárepinen «Sıpatlı bilimlendiriӯ – kúshli jámiyet» súreni astında bilimlendiriӯ taraӯı xızmetkerleriniń Respublikalıq II Ustazlar milliy forumı bolıp ótti.
Ilajda Qaraqalpaqstan Respublikası mektepke shekemgi hám mektep bilimlendiriӯ ministrliginiń xızmetkerleri, rayonlıq hám qalalıq mektepke shekemgi hám mektep bilimlendiriw bólimleriniń baslıqları, metodistleri, mektep direktorları hám de barlıq mekteplerden tájiriybeli pedagoglar qatnastı.
“II Ustazlar milliy forumı”n ótkeriӯdegi maqset – jańa oqıw jılı aldınan bilimlendiriw mákemeleriniń ótken oqıw jılı dawamında erisken nátiyjelerin hám kemshiliklerdi talqılaw, alda turǵan wazıypalardı belgilep alıwdan ibarat.
Ilajǵa Qaraqalpaqstan Respublikası Joqarǵı Keńesiniń komitet baslıǵı D.Qurbaniyazov, Ruwxıylıq hám aǵartıwshılıq orayı Qaraqalpaqstan Respublikası bólimi baslıǵı T.Atamuratov, Qaraqalpaqstan Respublikası Ministrler Keńesi Baslıǵınıń Jaslar siyasatı, sociallıq rawajlandırıw hám ruwxıy-aǵartıwshılıq isleri boyınsha orınbasarı B.Ótemuratovlar qatnastı.
Ilajdı Qaraqalpaqstan Respublikası mektepke shekemgi hám mektep bilimlendiriw ministri Axmed Narimbetov basqarıp bardı. Ilajda shıǵıp sóyleӯshiler elimizde bilimlendiriw mákemelerin qurıw, rekonstrukciyalaw, iri ońlaw, zamanagóy oqıw-laboratoriya úskeneleri, kompyuter texnikası hám oqıw-metodikalıq qollanbalar menen támiyinlew boyınsha jumıslardı ámelge asırıw arqalı olardıń materiallıq-texnikalıq bazasın bekkemlew, oqıӯshılardıń intellektuallıq, estetikalıq hám fizikalıq jaqtan rawajlanıwı ushın usı mákemelerdegi sharayatlardı túp-tiykarınan jaqsılaw, pedagoglardıń hám qánigelerdiń bilim dárejesin arttırıw, ulıwma orta bilim beriwdiń sapasın jaqsılaw baǵdarında ámelge asırılıp atırǵan jumıslarǵa toqtap ótti. Sonday-aq, oqıӯshılarǵa zamanagóy bilim beriw hám oqıtıwdıń sapasın bahalawdıń xalıqaralıq standartların engiziw boyınsha alda turǵan wazıypalar da aytıp ótti.
– Dástúriy ilajda bilimlendiriw tarawı xızmetkerleriniń juwapkershiligin hám belsendiligin arttırıw, 2022-2023-oqıw jılı juwmaqları boyınsha ótkerilgen bilim beriw sapası monitoringi, pán olimpiadalarında oqıwshılardıń bilimlerinde anıqlanǵan boslıqlar hám olardı tolıqtırıw boyınsha usınıslar berilip, muǵallimlerdiń kásiplik sheberligin arttırıw, aldıńǵı tájiriybelerdi en jaydırıw arqalı jańa oqıw jılında tálim-tárbiya sapasın ele de arttırıw boyınsha baslı wazıypalardı belgilep alıw tiykarǵı maqset etip qoyıldı,-deydi Respublikalıq bilimlendiriӯ orayı direktorı Q.Jubanov
Ilajda qatnasıwshılar menen óz-ara sáwbetlesiwler shólkemlestirildi hám olardıń usınısları tıńlanıp, búgingi kún talabınan kelip shıǵıp tiyisli wazıypalar belgilendi.
