Mámleketimizde bolıp atırǵan reformalarǵa Ózbekstan kásiplik awqamları da belsene úles qospaqta. Mámleketimiz basshısınıń baslaması menen elimiz tariyxında birinshi márte 11-noyabrdi «Kásiplik awqamları kúnin belgilew haqqında»ǵı nızam qabıl etildi. Qaraqalpaqstan Respublikası pedagoglardı jańa metodikalarǵa úyretiw milliy orayında 11-noyabr – Kásiplik awqamları kúnine arnalǵan bayram ilajı bolıp ótti.
Ilajda Qaraqalpaqstan Respublikası pedagoglardı jańa metodikalarǵa úyretiw milliy oraydıń oqıw hám metodikalıq isler boyınsha orınbasarı I.Pirniyazov hám basqalar shıǵıp sóylep, bul bayram elimizde keń túrde belgilenip atırǵanlıǵın, kásiplik awqamı komiteti tárepinen professor-oqıtıwshılar, jumısshı-xızmetkerlerdi qollap-quwatlaw, olardıń mashqalaların sheshiw baǵdarında ámelge asırılıp atırǵan ilajlar tuwralı maǵlıwmatlar berilip, búgingi kúnde kásiplik awqamlarınıń jámiyetimizdiń áhmiyetli bólegine aylanǵanın ayrıqsha atap ótti.
Bayram keshesinde sáne múnásibeti menen Pedagshogikalıq orayda sport jarısları hám hár qıylı ilajlar, ilimiy-pedagogikalıq jumıslar, oqıw hám jámiyetlik jumıslarda belsene qatnasıp kiyatırǵan bir topar professor-oqıtıwshılar hám xızmetkerlerge kásiplik awqamı komiteti tárepinen Húrmet jarlıǵı hám bahalı sawǵalar tapsırıldı.
