Qaraqalpaqstan Respublikası pedagoglardı jańa metodikalarǵa úyretiw milliy orayında ǵalaba xabar qurallarınıń wákilleri ushın mediatur shólkemlestirildi

Mediaturda qatnasıwshılar dáslep, oraydıń oqıw procesin shólkemlestiriw bóliminiń jumısları menen tanıstırıldı. Sabaq processleri menen tanısıw maqsetinde sabaq kestesi tiykarında qánigelerdiń «kásiplik sharshawı»nıń  aldın alıw teoriyaları hám usılları temasında ótkerilip atırǵan seminar-treningte boldı. Soń qánigeler tárepinen STEAM laboratoriyasınıń, metodikalıq xızmet kórsetiw bóliminiń, mediastudiyanıń, málimleme kitapxana orayınıń jumısları hám tıńlawshılardıń kitapxanadan paydalanıw imkaniyatları keń túrde tanıstırıldı. Ilaj dawamında atap ótilgenindey, Ózbekstan Respublikası Prezidentiniń 2021-jıl 25-yanvardaǵı «Xalıq bilimlendiriwi tarawındaǵı ilimiy-izertlew jumısın qollap-quwatlaw hám úzliksiz kásiplik rawajlandırıw sistemasın engiziw ilajları haqqında»ǵı qararınıń orınlanıwın támiyinlew maqsetinde Ózbekstan Respublikası Ministrler Kabinetiniń qararı menen 2022-jıl 17-yanvarda «Xalıq bilimlendiriwi xızmetkerlerin úzliksiz kásiplik rawajlandırıw sistemasın shólkemlestiriw tártibi haqqında”ǵı Reje tastıyıqlandı.   Rejede kórsetilgenindey, mektep bilimlendiriwi xızmetkerlerin úzliksiz kásiplik rawajlandırıw sistemasın shólkemlestiriw, olardaǵı kásiplik sheberlik hám mamanlıq dárejesiniń turaqlı ósiwi ushın zárúr sharayatlar jaratıw, zamanagóy talaplarǵa muwapıq qayta tayarlaw hám turaqlı túrde pedagogikalıq sheberligin arttırıp barıwdıń nátiyjeli mexanizmlerin engiziw tiykarında xızmetkerlerdi joqarı dárejedegi úzliksiz kásiplik támiyinlewge baǵdarlanǵan.   Ózbekstan Respublikası Prezidentiniń bir qatar párman hám qararları menen bilimlendiriw tarawında ámelge asırılıp atırǵan tiykarǵı princip – «ómir dawamında oqıw» principi tiykarında úzliksiz kásiplik rawajlanıw sisteması engizildi. Engizilip atırǵan jańa tártip boyınsha mektep bilimlendiriwi xızmetkerlerin hár jılı qánigelik arttırıw kurslarınan ótkeriw belgilengen bolıp, basshı xızmetkerler 30 saat,  pedagog xızmetkerler 36 saat kólemindegi úzliksiz kásiplik rawajlandırıw kurslarınan ótkeriledi.  Kurslar 6 jumıs kúnine mólsherlengen. Pedagogikalıq orayda  qánigeligin arttırıw kurslarınıń rejesine muwapıq, Qaraqalpaqstan Respublikasındaǵı mekteplerde xızmet etip  atırǵan jámi 36 498 pedagog,sonnan 32 917 mektep muǵallimleri, 3 581 basshı hám qánigeler qánigeligin arttırıwı belgilengen. 2024-jılı pedagogikalıq orayda 27462 pedagogtıń dástúriy túrde qánigeligin arttırılıwı rejelestirilgen bolsa, sonnan, 13511 pedagog 3-dárejedegi, 13951 pedagog 4-dárejedegi oqıw baǵdarlaması tiykarında oqıtılıwı belgilengen.  Al, 9036 pedagog 1-, 2-dárejedegi oqıw baǵdarlamaları tiykarında arnawlı platforma arqalı onlayn túrde oqıtılıwı rejelestirilgen. – Orayımızda házirgi kúnde tiykarǵı shtatta 44 professor-oqıtıwshı jumıs alıp baradı,-deydi oray baslıǵı B.Dilanov. – Tiykarǵı shtatta islewshilerden 1 ilim doktorı, 14 ilim kandidatları hám docentler bolıp, ilimiy potencial ortasha 34,9 procentke teń. Búgingi kúnde 11 professor-oqıtıwshı erkin izleniwshilik tiykarında ilimiy-izertlew jumısları menen shuǵıllanbaqta. Olardan 3 professor-oqıtıwshı doktorlıq (DSc) dissertaciyası, 8 professor-oqıtıwshı filosofiya doktorı (PhD) dissertaciyaları boyınsha jumıs alıp barmaqta. Ózbekstan Respublikası Prezidentiniń 2022-jıl 21-iyundaǵı PQ 290-sanlı qararında belgilengen ӯazıypalardıń orınlanıӯın támiyinleӯde, mektepke shekemgi hám mektep bilimlendiriӯi taraӯında oqıӯ barısın metodikalıq jaqtan joqarı basqıshqa alıp shıǵıӯ maqsetinde Ózbekstan Respublikası Xalıq bilimlendiriӯ ministrliginiń 2022-jıl 21-dekabrdegi 385-sanlı buyrıǵı tiykarında Qaraqalpaqstan Respublikası, Tashkent qalası hám barlıq ӯálayatlardaǵı Pedagoglardı jańa metodikalarǵa úyretiӯ milliy orayında “Metodikalıq xızmet kórsetiӯ bólimi” shólkemlestirilgen. Ǵalaba xabar qurallarınıń wákilleri usı bólim jumısları menen tanıstı. Metodikalıq xızmet kórsetiӯ bólimi baslıǵı hám pán metodistleri tańlap alınıp, házirgi kúnde bul jerde 1 bѳlim baslıǵı hám 23 pán metodisti, jámi 24 adam jumıs alıp barmaqta.   Al, pedagogikalıq oraydıń Málimleme kitapxana fondında 15838 oqıw ádebiyatları bar eken. Solardan 15483 danası kórkem ádebiyatlar, 500 den aslamı elektron kitaplar,  335 danası metodikalıq qollanbalar esaplanadı. Pedagogikalıq oraydıń professor-oqıtıwshıları tárepinen tayarlanǵan oqıw hám metodikalıq qollanbalar qaǵaz jáne elektron variantta málimleme-resurs orayına tapsırılǵan. Tıńlawshılar bul materiallardan ózleriniń bilimlerin jetilistiriw ushın paydalanıp kelmekte. Sonday-aq, barlıq pánler hám klasslar kesiminde mektep sabaqlıqlarınıń elektron variantları da málimleme-resurs orayı kompyuterlerine jaylastırılǵan