Xalqımız ázelden ustazlardı ádiwli insanlar sıpatında qádirlep kelgen. Hár bir insan ómirde qandayda bir jetiskenlikke erisse, kásibinen kamal tapsa, onıń artında ustazdıń miyneti bar ekenligin tereń uǵınadı. Ómir dawam eter eken, oqıtıwshılıq kásibi óziniń maǵanasın, áhmiyetin hám húrmetin hasla joǵaltpaydı.
Búgin Qaraqalpaqstan Respublikası Pedagogikalıq sheberlik orayında Fizika páni kurs tıńlawshıları tárepinen 1-oktyabr «Muǵallimler hám ustazlar» bayramı múnásibeti menen “Sizge tájim, áziz ustazlar” atamasında bayram keshesi ótkerildi.
Keshede «Anıq hám tábiyiy pánler metodikası» kafedrasınıń aǵa oqıtıwshısı B.Arzımbetova, Qaraózek rayonı 25-sanlı mekteptiń Fizika páni oqıtıwshısı G.Genjemuratova, Kegeyli rayonı 34-sanlı mekteptiń Fizika páni oqıtıwshısı R.Bekniyazovlar sózge shıǵıp, bayram menen bárshe tıńlawshılardı “Muǵallimler hám ustazlar” kúni bayramı menen qutlıqlap, máleketimizde bilimlendiriw tarawın hár tárepleme rawajlandırıwǵa qaratılǵan Prezidentimizdiń bir qatar Párman hám qararları boyınsha islenip atırǵan jumısları hám jetiskenlikleri haqqında aytıp ótti.
Bunnan soń tıńlawshılar ózleriniń tayarlaǵan hár túrli muzıkalıq, saxna kórinisleri menen bayram keshesine jaqsı keypiyat úlesti.
