Búgin, 23-yanvar kúni Qaraqalpaqstan Respublikası Pedagogikalıq sheberlik orayında “Kásiplik rawajlanıw kúni” hám “Kásiplik rawajlanıw saatı” ilajlarınıń keyingi basqıshın shólkemlestiriw maqsetinde singapurlı ekspert-trenerler tárepinen anıq pánler mentor-oqıtıwshıları ushın seminar-trening ótkerilmekte.
Seminarǵa ZOOM platforması arqalı Pedagogikalıq sheberlik orayında, Beruniy rayonı 1-mektepte, Qońırat rayonı 35-sanlı mektepte shólkemlestirilgen studiyalar arqalı anıq pánler boyınsha mentor oqıtıwshılar qatnaspaqta.
Esletip ótemiz, “Kásiplik rawajlanıw kúni” hám “Kásiplik rawajlanıw saatı” ilajları muǵallimlerdiń kásiplik rawajlanıw sistemasınıń úzliksizligin támiyinlew, olardıń kásiplik sheberligi hám qánigeligin arttırıwı ushın zárúr sharayatlar jaratıw tiykarında ulıwma orta bilim beriw mákemelerinde bilimlendiriwdiń sapasın arttırıwǵa qaratılǵan.
“Kásiplik rawajlanıw kúni” – oqıtıwshılardıń kásiplik sheberligin arttırıw, dóretiwshilik jaqtan izleniw hám óz bilimin turaqlı bayıtıp barıw, zamanagóy oqıtıw metodikası menen informaciyalıq-kommunikaciyalıq texnologiyalardan ónimli paydalanıw kónlikpelerin rawajlandırıw ushın oqıw-seminar, trening, sheberlik sabaqları hám óz betinshe bilim alıw ilajların ótkeriw belgilengen hápteniń arnawlı kúni.
