Qaraqalpaqstan Respublikası Pedagogikalg Sheberlik orayınıń «Anıq hám tábiyiy pánler metodikası» kafedrası, Fizika páni tıńlawshıları tárepinen 7-may Radio kúni múnásibeti menen “Tolqın artındaģı sırlar” atamasında keshe ótkerildi.
Keshede professor-oqıtıwshılar sózge shıǵıp, 1895-jılı 7-may kúni rossiyalı ilimpaz Aleksandr Stepanovich Popov birinshi márte radiotolqınlardı bir orınnan ekinshi orınǵa jiberiw hám qabıllap alıw qurılmasın kópshilikke tanıstırǵan, házirgi waqıtta 7-may-radionıń oylap tabılǵan kúni sıpatında dúnyanıń kóplegen mámleketlerinde keń túrde belgilenip kiyatırǵanın aytıp ótti.
Mámleketimizde ilim-texnika, texnologiyalıq ashılıwlar jáne de keńeyip baratırǵan házirgi dáwirde radio adamzattıń kúndelikli turmısınıń bir bólegine aylanǵan. Radio tıńlawshılardı jańalıqlardan xabardar etiw, kerekli maǵlıwmatlardı jetkeriw arqalı dúnyanıń kóp sanlı xalqın bir sheńber atırapında birlestiredi.
Eń arzan hám ǵalabalıq baylanıs-málimleme quralı sıpatında radio jámiyettiń barlıq qatlamı wákilleri ushın bilimlendiriw dárejesi, rasası, jası, materiallıq jaǵdayına qaramastan olarǵa jámiyetshilik dodalawlarında qatnasıw imkaniyatın beredi. Keshede radio haqqında qızıqlı video maǵlıwmatlar qoyıp berildi hám viktorinalar shólkemlestirildi.
