Húrmetli Prezidentimizdiń Qaraqalpaqstan Respublikasına saparında berilgen tapsırmalar sheńberinde qaraqalpaq xalqınıń ásirler dawamında jetip kelgen biybaha mádeniy miyrasın qásterlep saqlaw, onı jańa basqıshqa alıp shıǵıw hám dúnya kóleminde keńnen úgit-násiyatlawǵa ayrıqsha itibar qaratılmaqta.
Ásirese, milliy muzıka mádeniyatınıń ajıralmas bólegi esaplanǵan qobız soǵıw dástúrleri hám jırawshılıq ónerin zamanagóy hám ilimiy-ámeliy tiykarlarda rawajlandırıw, jas áwladtıń sanasına tereń sińdiriw, xalıqaralıq kólemde ǵalaba en jaydırıw máseleleri tiykarǵı wazıypa sıpatında belgilep berilgen edi.
Bul wazıypalardı keńnen engiziw maqsetinde Prezident Administraciyasınıń basshısı Saida Mirziyoyeva basshılıǵında sistemalı hám ámeliy jumıslar jolǵa qoyıldı. Atap aytqanda, tarawdı rawajlandırıwǵa qaratılǵan baǵdarlamalar islep shıǵılıp, milliy-mádeniy miyrastı qásterlep saqlaw, onı ilimiy úyreniw hám xalıqaralıq maydanlarda múnásip usınıw boyınsha anıq ilajlar belgilendi.
Usı jıldıń 8-13-dekabr kúnleri Hindstannıń Nyu-Deli qalasında YUNESKOnıń materiallıq emes mádeniy miyrastı qorǵaw Húkimetleraralıq komitetiniń gezektegi XX sessiyası bolıp ótpekte.
Bul sessiyada Ózbekstan Respublikasınan usınılǵan “Qobız soǵıw hám atqarıwshılıq óneri” (milliy) kandidaturasın YUNESKOnıń jedel qorǵawǵa alınıwı lazım bolǵan materiallıq emes mádeniy miyrası elementleriniń dizimine kirgiziw haqqındaǵı qararı bir dawıstan qabıl etildi.
Sonı ayrıqsha atap ótiw orınlı, sońǵı jılları elimizde Prezidentimiz tárepinen barlıq tarawlar qatarında xalqımızdıń bay mádeniyatlarınan biri bolǵan baqsıshılıq hám jırawshılıq ónerin bunnan bılay da rawajlandırıw, onıń milliy mádeniyatımız hám kórkem ónerimizdegi ornı menen áhmiyetin arttırıwǵa ayrıqsha itibar qaratılıp, bul baǵdarda keń kólemli jumıslar ámelge asırılmaqta.
“Qobız soǵıw hám atqarıw kórkem óneri”niń YUNESKO dizimine kirgiziliwi onıń tariyxıy, ruwxıy hám mádeniy qádiriyat sıpatındaǵı ornınıń xalıqaralıq dárejede tán alınıwı bolıp esaplanadı.
Komitettiń qararında atap ótilgenindey, dástúriy epikalıq dástanlardı atqarıwda keńnen qollanılatuǵın qobız ásbabı áhmiyetli sociallıq wazıypalardı atqaradı. Atap aytqanda, ol jámiyette awızbirshilikti bekkemlew, mádeniy miyrastı qásterlep saqlawǵa xızmet etetuǵını atap ótilgen.
Sonday-aq, bul qarar jırawshılıq ónerin ilimiy izertlew, ustaz-shákirt dástúrlerin qásterlep saqlaw, jańa oqıw baǵdarlamaların islep shıǵıw, xalıqaralıq birge islesiwdi keńeytiwge járdem beredi.
Bul quwanıshlı waqıya menen pútkil xalqımız, kórkem óner ıqlasbentleri, ustaz kórkem óner sheberleri hám bul biybaha miyrastı kózdiń qarashıǵınday qásterlep saqlap kiyatırǵan pidayı insanlardı shın júrekten qutlıqlaymız.
