Prezident hám qánigelestirilgen mekteplerdiń aldınǵı tájiriybelerin ulıwma bilim beriw mákemelerine engiziw, bilimlendiriwdiń sapasın bunnan bılay da arttırıw hám pedagoglar arasında tájiriybe almasıw maqsetinde Nókis qalasındaǵı Prezident mektebinde “Ashıq esikler kúni” ilajı shólkemlestirildi. Ilajda Qaraqalpaqstan Respublikası Pedagogikalıq sheberlik orayınıń direktorı Gulistan Kojabaeva, oraydıń professor-oqıtıwshıları hám de oraydıń tıńlawshıları qatnastı. Ilaj dawamında Prezident mektebi oqıwshıları tárepinen tayarlanǵan túrli innovaciyalıq joybarlar tanıstırıldı. Oqıwshılar óz joybarlarınıń mazmun-mánisi, maqseti hám ámeliy áhmiyeti haqqında tolıq túsinikler berip ótti. Sonday-aq, ilaj qatnasıwshıları mekteptiń zamanagóy materiallıq-texnikalıq bazası, laboratoriyaları, oqıw xanaları, kitapxanası hám oqıwshılar ushın jaratılǵan qolaylı sharayatlar menen jaqınnan tanıstı. “Ashıq esikler kúni” ilajı qatnasıwshılarǵa Prezident mekteplerindegi aldınǵı tájiriybelerdi úyreniw, olardı ulıwma bilim beriw mekteplerinde de qollanıw boyınsha jańa ideyalar alıw imkaniyatın berdi.
