Qaraqalpaqstan Respublikası Pedagogikalıq sheberlik orayında professor-oqıtıwshılardıń kásiplik kompetentligin arttırıw hám metodikalıq potencialın bekkemlew maqsetinde Anıq hám tábiyıy pánler metodikası kafedrasınıń aǵa oqıtıwshısı Dilfuza Qutlımuratova tárepinen “Sinektika metodı” atamasında seminar-trening ótkerildi.
Seminarǵa oray direktorı Gulistan Kojabaeva qatnasıp, zamanagóy bilimlendiriw procesinde innovaciyalıq pedagogikalıq texnologiyalardı engiziw úlken áhmietke iye ekenin atap ótti. Sonday-aq, sinektika metodınıń oqıtıwshılardıń dóretiwshilik pikirlewin rawajlandırıw, sabaq nátiyjeliligin arttırıw hám oqıwshılardıń belsendiligin kúsheytiwde áhmiyetli qural ekenin ayrıqsha atap ótti.
Seminar dawamında qatnasıwshılarǵa sinektika metodınıń mazmun-mánisi, onıń bilimlendiriw procesindegi ornı hám ámeliy qollanıw imkaniyatları haqqında tolıq maǵlıwmat berildi. Sonday-aq, innovaciyalıq qatnasıqlar tiykarında mashqalalardı dóretiwshilik penen sheshiw usılları ámeliy sabaqlar arqalı kórsetildi.
Ilaj dawamında professor-oqıtıwshılar óz-ara tájiriybe almasıw, pikir-usınıslar bildiriw hám metodtı ámeliyatqa nátiyjeli engiziw boyınsha zárúr kónlikpelerdi qáliplestiriw imkaniyatına iye boldı.
