Korrupciyasız jámiyet – abadan turmıs tiykarı

Pedagogikalıq sheberlik orayında “Korrupciyaǵa qarsı gúres – aydın keleshegimizdiń tiykarı” atamasında ushırasıw shólkemlestirildi. Ilajda oraydıń professor-oqıtıwshıları hám tıńlawshıları qatnastı. Ushırasıwdı Social-ekonomikalıq pánler kafedrası baslıǵı, tariyx ilimleriniń kandidatı, docent R.Bauetdinov ashıp berdi hám alıp bardı. Ilaj dawamında Ózbekstan Respublikası Ministrler Kabinetiniń 2026-jıl 24-apreldegi 202-sanlı qararınıń qosımshasınıń 42-bántinde hám Ózbekstan Respublikası Mektepke shekemgi hám mektep bilimlendiriwi ministrliginiń 2026-jıl 18-maydaǵı 03-13-2584-sanlı xatında belgilengen wazıypalardıń orınlanıwın támiyinlew máselelerine ayrıqsha itibar qaratıldı. Sonıń ishinde, xalıq arasında huqıqıy mádeniyattı arttırıw, huqıqbuzarlıq hám korrupciyanıń jámiet hám mámlekettiń rawajlanıwına unamsız tásiri haqqında durıs kózqarastı qáliplestiriw, korrupciyaǵa qarsı gúresiw boyınsha úgit-násiyat jumısların kúsheytiw máseleleri dodalandı. Ushırasıwda: Qaraqalpaqstan Respublikası Nókis rayonlar aralıq hákimshilik sudınıń sudyası, yuridikalıq ilimler doktorı (DSc), professor Q. Babanazarov “Korrupciyaǵa qarsı gúresiw mádeniyatın qáliplestiriwde úgit-násiyat jumıslarınıń áhmiyeti” atamasında; Qaraqalpaqstan Respublikası Nókis qalalıq sudınıń tergew sudyası D. Srajadinov “Korrupciyaǵa qarsı gúresiw hám onıń aldın alıw – tiykarǵı wazıypamız” atamasında; Social-ekonomikalıq pánler metodikası kafedrasınıń aǵa oqıtıwshısı A. Shrazov bolsa “Korrupciya hám onıń belgileri” temasında bayanatlar menen qatnastı. Atap ótilgenindey, xalıqtıń huqıqıy sanası hám mádeniyatın arttırıw, korrupciyaǵa mawasasız qatnastı qáliplestiriw maqsetinde úgit-násiyatlaw materialları hám prezentaciyalardan keńnen paydalanıw, tarawǵa baylanıslı nızamshılıq hújjetleri jáne ishki lokal normativlik hújjetlerdi xızmetkerlerge jetkerip barıw úlken áhmietke iye.